Ka skul ka buh hakhmat eh ban pdiang ïa ki khynnah kiba pep skul shiteng por: T. Lakiang
Kawei na ki skul kaba ju ïarap ïa ki khynnah kiba pep skul shiteng por ba kin ïoh lad ban bteng biang ïa ki jingpule kata ka R.C. EVE Secondary School Mihmyntdu West Jaiñtia Hills mynta ka sngi kala leh burom ïa kane ka sngi “World Literacy Day 2023” halor ka phang kaba ong “Promoting Literacy for a world in transition, Building the foundation for sustainable and peaceful societies”.
La pynlong ïa ka prokram shi bynta ban ailad ïa ki khynnah skul ba kin pynpaw pyrthei ïa ki sap ki phong jong ki naduh ki jingpule ïa ki poetry, ki jingkren lyngkot kiba ïadei bad ka jingkordor ban ïoh ïa ka jingnang jingstad, ha kaba la pynlong ruh ïa ka jingïakop drodur bad ka jingthoh poetry.
Hashaw kane la don ka jingïalang ba lyngkot ba la pynïaid da ka kong Baiahunlang Phawa (Asst. Teacher) ha kaba la ïoh ka jingkren na ka Headmaster jong kane ka skul ka kong Tina Lakiang kaba la pynsngew ba ïa kane ka sngi la rakhe ïa ka naduh ka snem 1966, hynrei kum ka skul kala pyrshang ban rakhe ïa kane manla ka snem kum ka dak ban wanrah biang ïa ki khynnah kiba la pep skul sha ka jingnang jingstad.
Naduh u snem ba la sdang seng ïa kane ka skul 2004 ha shnong Mihmyntdu ka jingnang jingstad ha kane ka shnong ka don tang kumba 40% hynrei mynta kala kiew sha ka 95% bad ka long ka jingmyntoi kaba khraw eh.
Kumba long mynta hapoh kane ka snem ka jingwan rung pule jong ki khynnah kiba la pep skul shiteng por kala kynjop sha ka 104 ngut da kaba ka skul ka pdiang ïa ki ha kano kano ka por la ka dei ka por shiteng snem kumjuh, khnang ba kin ïoh biang ka jingnang jingstad, ong ka kong Lakiang.
“Khlem ka jingnang jingstang kan long ka jingsahdien ïa ka imlang ka sahlang bad ha ri hi baroh kawei, kumta ka skul ka buh hakhmat eh ban ïarap ïa ki khynnah kiba pep skul shiteng por” la pynkut ka kong Lakiang.
La pynshong shit shuh shuh ïa kane ka sngi da ka jingshad Pliang da ki khynnah jong kane ka skul, ha kaba la ïoh ruh ka jingkren halor kane ka phang da ka Jessica Biam, Asst. Teacher.
