Ka Khasi Student’s Union Jaintia Hills District (KSU-JHD) ka ai khublei kitbok kitrwiang ia ka Niaw Wasa United Sports & Cultural Club ka ban sa leit iakhun ia ka Hero Futsal Championship bad mihkhmat na ka Jylla Meghalaya ha ka 5 tarik November kaba la pynlong da ka All India Football Federation India.
Ka seng ka pynpaw ba kane ka dei ka sien kaba nyngkong ia ka Futsal tournament ha ka National level ka ban sdang naduh November 5 haduh 13, 2021 ha nongbah New Delhi. Ha kane ka lympung ialehkai yn wan iashim bynta haduh 16 tylli ki sport clubs ba lah kynthup ia ka Niaw Wasa United Sports & Cultural Club kaba na ka Jylla Meghalaya. Ka Seng ka dap da ka mynsiem sngewsarong ba kane ka club kaba la trei shitom ban poi haduh kane ka kyrdan ban mihkhmat ia ka Jylla.
Ka seng ka kitbok kitrwiang ba ka Niaw Wasa kan nang iaid bad ban nang iai kiew shaphrang bad la kyrpad ruh ia ki para ri jong ka Jylla Meghalaya ba kin sngewbha ban iarap lem da kaba ai mynsiem bad ban pynnoh synniang sha katei ka club kaba lah pynkiew shisha ia ki khun samla ha ki kam sports.
“Ka jingdon jong kane ka sport club ka iarap ban pynkiew ia ka kam sports hapoh ka Jylla bad ka long shisha ka jingkyrkhu ia ka ri bad ka jaidbynriew” ong u Samla Justice Paul Lyngdoh Education Secretary jong ka KSU-JHD.