Ka office u District Tuberculosis Officer, East Khasi Hills District mynta ka sngi ka la pynlong ia ka program kaba ia dei bad ka jingpyllait paidbah ia ka Ni-Kshay Mitra Project ha East Khasi Hills District halor ka “Jingsam ia ki jingbam sha ki nongpang TB (Tuberculosis) da ka “Doctors For You”, ha Reid Provincial Chest Hospital Hall, Jhalupara, Shillong.
I Deputy Commissioner ka East Khasi Hills District I kong R.M. Kurbah ia la iadon lang ha kane ka programme kum ka Kongsan. Ka Doctors For You kaba dei ka seng trei mon sngewbha lane ka Non-Governmental Organisation (NGO), ka la jied ia 100 ngut ki briew kiba don ia ka jingpang TB na East Khasi Hills District ha kaba kane ka seng (Doctors for You) kan pynbiang ia ki jingbam kiba tei ia baroh kiba la ioh ia ka jingkyrshan bad jingkit khlieh na ka MYLAN Pharmaceutical Pvt Ltd, Bangalore.
Kumban shu pynkynmaw ba ia ka NI-KSHAY MITRA la pyllait paidbah da ka President ka ri India hapoh ka Pradhan Mantri TB Mukth Bharat Abhiyan ha ka 9 tarik u Nailur, 2022.
I kong R.M. Kurbah ha ka jingai jingkren i la pynpaw ia ka jingsngewnguh ia ka “Doctor For You” namar ka jingshim khiah jong kane ka NGO ban leit wad ia ki nongpang sha ki District bad pynpaw ia ka jingkyrmen kaba bha ba kane ka project kan ioh ia ka jingshaniah kaba shisha ban ratdyngkhong ia ka jingpang TB na ki shnong ki thaw bad na ka ri hi baroh kawei.I la kyntu ruh ia baroh ki nongpang kiba la iadon lang ha kane ka programme ban dih tikna ia ki dawai dashin bad kumjuh ban shim ia kane ka lad lyngba kane ka project ban sumar bha la la ka met bad ban bam ia ki jingbam kiban tei ia ka met ki ban iarap ha ka jingpyrshang jong ki ban ioh biang ia ka jingkoit jingkhiah.
Hapdeng kane ka programme, I Kongsan ryngkat lang bad kiwei pat ki heh sorkar ki la ai ia ki jait jingbam ba tei sha ki nongpang. I Dr. M. Mawrie, ba long i State Tuberculosis Officer i la ai ia ka Ni-Kshay Mitra Certificate sha i kong R.M. Kurbah, Deputy Commissioner, ka East Khasi Hills District.