Ka Akhil Bharatiya Vidyarthi Parishad (ABVP), Jowai Unit ha kane ka 13 tarik u Nailur kala pynlong ïaka prokram pynkup burom ïa ki samla pule kaba la tip ‘U Kiang Nangbah Best Student Award-2023’, ïa kaba la pynlong ha District Library Auditorium, Mynthong, Jowai.
Ha kane ka sngi u Myntri sorkar ka jylla ba dei peit ïa ka tnad Revenue and Disaster Management, Excise Department bad kiwei ma Kyrmen Shylla ula long kum u kongsan haka jingdonlang u ma Puramon Kynjing Dalloi Jowai Elaka kum u symbud kongsan, ka samla Nibiang Sumer District Organising Secretary ka ABVP kaba pynïaid ruh ïa ka jingïalang nalor ki kmie ki kpa jong ki samla pule bad kiwei de.
Na ka liang ka ABVP Jowai Unit kala ïoh ban pynkup burom haduh 80 ngut ki samla pule ka Ri-Lum Jaiñtia kiba la poi bha shakhmat (Topper) ha ki Exam bapher bapher jong ka SSLC bad HSSLC jong u snem 2023.
Na ka liang u kongsan jong kane ka sngi u ma Kyrmen Shylla haba ai jingkren ula ai ka jingïaroh ïa ki samla pule kiba la ïoh ïa kane ka khusnam lyngba kane kan dang ai mynsiem shuh shuh ïa ki samla ba kin dang bteng ïa ka jingpule kiba kham shalor ban kiew ka jaitbynriew bad ka Ri hi baroh kawei.
Shuh shuh ula kyntu ïa ki samla pule ban long kiba biang por ha kino kino ki bynta jong ka jingim, ban long kiba trei shitom bad kiba don ïa ka burom ka akor, da kaba pynkut ïa ka jingkren u ong ba ki samla ki dei ki lawai jong jylla bad ka Ri hi baroh kawei.
Katba u ma Puramon Kynjing ula ai ïathuh khana shaphang ka jingim jong u Kiang Nangbah kum uwei na ki nongai mynsiem ïa kiba bun mynta, halor ka jingïaleh jong u ban pynlaitluid ïa ka Ri na ka jingshah shynshar ha ka sorkar phareng.
Na ka liang ka samla Nibiang Sumer kala pynsngew shaphang ki kam kiba ka ABVP kala synñiang ha kiba bun ki liang da ka jingthmu ban wanrah ïa ka jingbha jingmiat lyngba ki samla pule.
Shuh shuh kala ong kum ka seng ABVP jong ki samla pule kala kner ïa ki kti ban ai ka jingshakri kaba bha tam ha ka imlang ka sahlang hapoh ka Ri lyngba ki prokram bapher bapher.
