Ka Hynniewtrep Border Disputed Redressal Forum (HBDRF), kala pynlong ia ka jingialang ha ka 29.10.2021 ha District Library Mynthong Jowai, na ka bynta ban iatai halor u pud u sam jong ka jylla Meghalaya bad ka Assam bad ka jingeh jong ki paidbah ha ki thain Block-I mynta la bun bun snem.
Ha kane ka sngi ia ka jingialang la pyniaid da u Chairman ka HBDRF, u ma Chandame Sungoh, ha ka jingdonlang u Secretary ka Labang Nongphyllut Pangam Raliang Council (LNCP), ma Thomas Passah nongaiktien ka HBDRF, Kong P Phawa Secretary ryngkat ka jing iashim bynta lang da ki kynhun sengbhalang bapher bapher na ri Lum Jaintia kiba kynthup ia ka KSU, JSU, HYC, JSM ki seng jong ki longkmie bad kiwei.
Ha kane ka jingiakynduh lang, na ka liang ki nongialam ka Furum kala rai ban pynbiang ia ki kot ki sla kiba don kam ha ka jingiadei bad u pud u sam sha katei ka thain Block-I ban leit pyni ia u Myntri Rangbah ka jylla ia ki jaka puta ba dang hap hapoh ka jylla Meghalaya. Shuh Shuh ka Furom hi kam iahap satia ia kata ka jingpynbeit pud pynbeit sam hapdeng ki ar tylli ki jylla da kaba pyntreikam da ka Give and Take Policy, namar lada kin leh da kane kamut ka jylla Meghalaya kan ioh shitroh bad ka jylla Assam kan ioh shi khoh ka jaka puta.
