Ka KSU East Jaintia Hills District Unit ba la lam khmat da u Bah Streamly S Suchen bad i Bah K S Suchiang General Secretary ryngkat ki dkhot ka seng ki la iakynduh ia u Deputy CM ka sorkar jylla Bah PrestoneTynsong ha ka 18 tarik September 2023 ïingsah jong u ban pynsngew ia ki mat baktah ia ka District hi baroh kawei. Ki mat ki long halor ka jingdon ka BSF Camp ha Sonapyrdi, Ratacherra, Hingaria kiba long ki nongpynwit nongpynthud ia ki nongshong Shnong ki tei ki thaiñ, ka jingdon kine ki BSF kibajuh mliem ban talasi ia ki trai Shnong ba leit iew leit hat bad ki juh ktah kti bad leh kynshlei ia ki kynthei khynnah ruh kumjuh.
Ka seng ka la dawa ruh ban don sa kawei ka Anti infiltration check gate ha Tongseng ban talasi ia ki briew lane ki Bangladeshi ba wan rung beaiñ sha ka jylla ban shong ban sah khlem don ki kot ki sla ba biang.
Ka seng ka la dawa ruh ban maramot ia u surok NH-6 ba la jot rathai ha baroh shi lynter ka District kata naduh Shohshrieh haduh Malidor bad kaba ilehrain ruh ban iohi kat ka District Headquarter ki surok kiba la long kum ki surok khlaw ba don da ki pung suda ha ka por slap bad ha ka por ba rang ki paidbah ki hap ban mad ia u pumpum ba la ishyrkhei. Na ka liang ka seng ka la dawa ruh ban don noh da ka Traffic Branch hapohka District kum shibynta ban teh lakam ia ka jingdheng kali ba man ka sngi ha ka District Headquarter Khliehriat bad Ladrymbai kaba ktah ia ka leit ka wan ki paidbah ki khynnah skul bad khamtam kan long ka jingma ha ba don ba pang ba shitom ka ba lah ban wanrah ia ka jingsngewsih.
Na ka liang jong u Deputy CM ka Jylla ula kular ban shimkhia ban weng noh ia kitei ki BSF Camp kiba long ki nongpynwit ia ki paidbah ka thaiñ. Haba iadei bad ka Anti Infiltration check gate u la kular ban bishar shwa bad ula ong ruh ban pyntreikam pura ia ka District Task Force ha ka District kumba long ha East Khasi Hills District, bad halor u surok NH-6 u la ong ba ka jingpyntrei lane ban maramot ka lah ban sdang shuwa ban kut une u bnai Nailur lane ka lah ban sdang ha ka taiew ba nyngkong u Bnai Risaw.
Ka seng kan iai bud dein bad peit pyrman ia ki jingeh ki paidbah ka thaiñ, ka seng ka la buh jingkylli ruh ba kumno ka sorkar MDA 2 ba la ialam da u Conrad K Sangma ka iehkhunswet ia ka District kaba pynmih bun ki khajna ban pyndap ia ka pla tyngka ka sorkar? Kaseng ka kyntu jur ia ki arngut ki MLA ka thaiñ kita U Bah Kyrmen Shylla ba dei ruh u Cabinet Minister bad ka Kong Santa Marry Shylla ban kren e iei ma ki ruh, ym ban shu sngap mynthi kat kane ka jingeh ba ki paidbah ki mad ha baroh ki liang.
Kane ka long katkum ka kyrwoh ba la pyllait da u Hamewanpynhun Ryngkhlem, Publicity Secretary,
KSU East Jaintia Hills District Unit.
