Ka Shnong Panaliar Jowai hadien ka Lyiur badei ka samoi u slap, ka shait pynkhuid ia ki jaboh jabaiñ ha shilynter ka Wah Myntdu ba hap hapoh u pud u sam jong ka, kyrpang ia ka Syntu Ksiar, kawei na ka jaka ba kyntang bad ba khring ia ki nongwan jngohkai.
Kumta ha une u snem ruh, ka la sdang ban pynkhuid ia ka jaka badei ka bynta ka Syntu Ksiar bad ruh la pynduh ia ki katto katne ki jingthoh ba shait buh ka seng Jaiñtia Fishing and Environmental Protection Association, Jowai, halor ka nongrim ba ka NOC ba la ai ia katei ka seng na ki snem mynshuwa ka lahkut, ha kajuh kapor la shait pynkynmaw hi na ka shnong ia ki, ban pynthymmai ia ka, te kim patiaw ia kane.
Ha ka jingiadei bad kane, ka seng JFEPA ka la file FIR ia ka shnong bad ka la maham ruh ia ki briew ba ka shnong ka phah pynkhuid ia kitei ki jaka. Kumta ka shnong baroh kawei ka la sngew bitar ia kane ka jingleh khlem akor jong katei ka seng, ka bymtip ne sngewthuh wat ia ka bor shnong ruh. Ki nongtreikam shnong ki la bitar lut bad lakhot ia ka jingialang ba kyrkieh halor katei ka FIR bad la mih ka rai na ka ïing baroh kawei ban pynduh shisyndon ia kino kino ki kam ba ka Jaiñtia Fishing and Environmental Protection Association, Jowai, ka thmu ban pynlong hapoh u pud u sam ka shnong.
Kane kamdei ka rai ba thymmai jong ka shnong, la don naduh mynshuwa ba, kino kino ki seng ne riew shimet kim lah ban pynlong ia ki kam paidbah khlem da pyntip ne iohbor na ka shnong. Mynta, kyrpang ia katei ka seng, kamlah shuh ban pynlong Fishing Competition ha shilynter ka Wah Myntdu badon hapoh u pud u sam ka shnong, bad lada ka pyrshah ia kane, ka shnong ka lah ban pyntreikam ia ki aiñ shnong jong ka, da kiba kham eh.
Kumta, ka shnong ka khot ka wer iaphi baroh kiba pule ia kane ka khubor ban pynbna shuh shuh sha kiwei, khnang ba kin dup tip ia kane ka jingleh donbor bad khlem akor katei ka seng, ki bym sngewthuh bad bymtip ia ki aiñ jong ki shnong bapher bapher ba ki lah buh ha ki shnong jong ki.
Ka shnong Panaliar ka khang pyrshah ruh ia ka prokram ka ban pynlong da ka seng Jaiñtia Fishing and Environmental Protection Association, Jowai ba iasnohktilang bad ka Rotary Club Jowai kaban sa long ha ka 24.09.2023 hapoh u pud u sam ka shnong. Kane ka long katkum ka khubor bala pyllait da u ma Riquoma Rq. Laloo, Waheh Shnong ka Panaliar.