Da ka jingthmu ban poi sha ki nongsengkam lajong lyngba ki MSME, ka Reserve Bank of India (RBI), Shillong kala pynlong ia ka Town Hall Meeting halor ka Micro Small and Medium Enterprises (MSMEs) ha kane ka 22 tarik mynta u bnai ha Thangbuli Club Hall, Amlarem, West Jaintia Hills District.
Ia kane ka jingialang la pyniaid da u Navneet Singh Nagar, DGM, RBI Shillong ha ka jingiadon ryngkat jong i kong D V Lyngdoh, ADC, West Jaintia Hills District, Regional Manager, SBI, Regional Manager, MRB, ki nongtrei jong ka Directorate of Commerce & Industries, Govt. of Meghalaya, ki nongtrei na ka Meghalaya Basin Management Agency, ki nongtrei jong ki Bank bapher bapher bad ki nongsengkam lajong na West Jaintia Hills District.
Na ka liang jong u Navneet Singh Nagar ula pdiang burom ia baroh kiba la shah khot sngewbha bad kumjuh ruh ia ki nongiashim bynta. U la ai ruh ka jingpynshai sha baroh ki nongsengkam lajong ba kumno kin ioh ia ka jingshai bad jingsngewthuh halor kumno ban pyniasoh ia ka kamai jong ki bad ki Bank.
La ioh ruh ka jingkren na i kong D V Lyngdoh, ADC, na u G Sarma, RM, SBI bad u Deepak Singha Roy, RM, MRB kiba la kyntu ia baroh kiba la poi sha kane ka jingialang ban shim ia ka lad ka kabuh kaba kila ioh lyngba kane ka prokram.
Nalor ki nongtrei na ki Bank la ioh ruh ka jingkren na ki nongtrei jong ka Meghalaya Basin Management Agency kiba la ai nuksa ia ka jingjop jong ka IVCS Sohphoh kaba la ithuh mynta kum ka Cluster hapoh ka Sfurti Scheme jong ka Sorkar India. Ha kane ka sngi la wan ban ai jingkren bad jingpynshlur da ka kong Trinity Saioo kaba dei ka Padam Shree Awardee kaba la iathuh halor ka jingtreishitom jong ka ban kyntiew ia ka jingithuh ia u Shynrai Lakadong hapoh ka Ri bad shabar Ri kumjuh. Kiwei de ki nongsengkam lajong ruh kila ai jingkren ha kane ka prokram.
