–Ai khublei ka JFEPA ia baroh ki dkhot bad kiba wan iashim bynta ha ka jingiakop–
Ka jingiakop khwai dohkha kaba 30 ne ka 30th Fishing Competition 2023 ba la pynlong da ka Jaiñtia Fishing Environmental Protection Association (JFEPA) kaba la pynlong ha ka sngi Saitjaiñ (23/09/23) ka long kaba iaid beit iaid ryntih ia kaba la shah ban khwai naduh na Damser Treiongriang haduh ha Kharthymme Wah.
Ha ka prokram sam khusnam jong ka seng kaba la pynlong ha ïungwalieh jong ka Tpep Pale la wan ban iadonlang da ka kong R.V. Lyngdoh kaba dei ka CEO jong ka JMB kum ka Kongsan. Ka kong Lyngdoh haba ai jingkren ha kane ka sngi kala pynshlur ia ki paidbah ba kin long kiba smat ba sting ban leit khwai doh, namar ba ka long kawei na ki bynta kaba lah ban wanrah ia ka jingkoit jingkhiah ia u briew, ha ka juh ka por ka la ong ba ki briew kin don ia ka mynsiem jingieit ia ka mei mariang bad kumjuh ia ka sawdong sawkun.
Ia ka jingialang ha kane ka sngi la pyniaid da u ma D.H. Pde President ka seng, ha ka jingiadon ryngkat u ma J.M. Pohsngap bad kiwei de ki para dkhot jong ka seng. Ka seng ka ai khublei kyrpang ia baroh ki dkhot jong ka kiba la trei shitom ban pynlong ia kane ka prokram kaba jop bad ha ka juh ka por ka seng ka ai khublei ruh ia baroh ki nongkhwai kiba la wan ban iashim bynta ha kane ka jingiakop, wat la ka don hapdeng katto katne ka jingpynwit pynthut ia ka jingiaid lynti jong ka seng.
Ia ka First Prize na ka liang ki Dohkha Pnar la ioh da u ma Dei Satieñ bad ka First Prize na ka liang ki Dohkha Dkhar la ioh da u Suha Passah.
La ioh ruh ka jingkren na u ma Pohsngap uba la iathuh ia ka jingiaid lynti jong ka seng naduh bala seng ia ka kata ha u snem 1993, ha ka por ba jur bha ka jingpynsniew ban pynduh pyndam ia ki doh um doh pnat kiba don ha ka wah Myntdu, ha kaba da ka jingtrei shitom jong ka seng la lah ban wanrah ia ka jingkylla kumba long mynta.
Ia ki kyntien ai khublei la ai da u Secretary ka seng u ma M. Challam ha kaba u la ban jur ruh ia ki nongkhwai khamtam ia ki samla ba kin wan sha khmat ban rung dkhot ialade hapoh kane ka seng khnang ba ka lawei jong kane ka seng kan nangbha bad nang skhem shuh shuh na ka bynta ban iada ia ki dohum dohpnat ha kylleng ki wah kiba don hapoh Ri Lum Jaiñtia, pynkut ka tyllong khubor.
