Ka Women’s Wing jong ka Kur Passah Jowai (Pohchnong) kum shi bynta ban pynmih phon ia ka seng kur kala pynlong da ka iew die jingbam ne ka Food Fest Cum Mini Lucky Draw hynnin ka sngi ha Yungwalieh jong ka Loomiongkjam, Jowai.
Ha kane ka sngi u CEM ka JHADC u ma Thombor Shiwat ula long u kongsan katba u Dolloi ka Elaka Jowai u ma Puramon Kynjing kum u Symbood Kongsan.
Ia ka jingialang la pyniaid da ka kong Finland Passah, ka Vice Chairperson ka bad la ioh ruh ia ki kyntien Ngoohblai na ka kong Dathrang I Passah.
Haba kren ha kane ka prokram u ma Puramon ula pynpaw ka jingiaroh ia ka seng ki longkmie ka Kur Passah kaba la lah ban pynlong ia ka kum kane ka iew die jingbam bad iaroh ia ka jingleh jong ka seng ban pynlum pynlang ban pyniatylli kawei ia ki khun jong ka kur Passah.
Na ka liang jong u ma Thombor Shiwat, CEM, JHADC ula ai khublei ia ka Women’s Wing kaba la pynlong ia kane ka Food Fest bad u la pynpaw ba ki longkmie ki dei ka bor ban wanrah ia ka bha ka miat ia ki khun ki kti, ha ka longïing bad kumjuh ruh ha ka kur ka jait.
Kiwei de kiba ai jingkren ha kane ka sngi ki kynthup ia u ma Wanpoi Passah bad u ma S.K. Lato.
Ia ka jingialang la pynkut da ki kyntien ai khublei na ka Samandaka Passah kaba long ka Chairperson ka Women’s Wing.
Ka iew ka long kaba thnem bad baroh ki jingbam bala pynkhreh da ka seng kila lut plain haduh ba kut ka prokram. La pynlong ruh ia ka jingpynkhalai ia ka Mini Lucky Draw jong ka seng.
