Ki Dkhot jong ki khynhun seng bhalang hapoh ka jingïalam ka KSU EJHD Unit bad ki paidbah mynta ka sngi 25 tarik u Nailur kila pynlong syndon ïa ka jingpakhang lynti ha u surok bah NH-6 bad ban thung syndon da u kba hapdeng surok bad ka jingkhwai dohkha kum ka dak ban pynrem jur ïa ka jingbym patiaw jong ka sorkar ïa ka jingeh jong kiba bun ba lang.
Ïa kane ka jingpakhang lynti la pynlong ha sor Khliehriat hapdeng u surok bah NH-6, ha kaba kitei ki dkhot jong ki kynhun seng bhalang bapher bapher bad ki nongshong shnong kika ïa mih paidbah ban shong hapdeng surok ha ryngkat ki pla card bad ki jingpyrta pynrem sorkar kumjuh ïa ka NHAI kaba dei peit ïa u surok.
Kumba long mynta katba nangmih ki sngi une u surok NH-6 ula nangjur shuh shuh ka jingsniew bad uba la jan kylla kum u surok khlaw kaba buh jingeh ïa ki kali ban ïaid naduh kiba rit haduh kiba heh bad bunsien ki kali ki sniew pynban tang ha shiteng lynti.
Halor kane, kaei kaba la pynlong ïa ki bor sorkar kumjuh ïa ka NHAI ban hun ïa kane? Bad ki bym pyrwa eiei ïa ka jingeh jong ki paidbah kiba ïaid lynti lyngba une u surok NH-6, ym tang katta une u surok u long kum u budlum ïa ka jylla bad kumjuh uba pynïasoh ïa kiwei de ki jylla kiba doh hapoh ka thaiñ shathei lam mihngi (North East).
“Lada kane ka jingsniew ka dang ïai bteng kan long ka jinglehraiñ kaba khraw eh ïa ka jylla, kumta ka sorkar kala dei ban shim noh ka jingkitkhlieh da kaba ïakren sngewthuh bad ki bor jong ka NHAI ban leh noh ïa kaba donkam” ym ban shu pynjynjar manla ka por ïa ki nongleit nongwan.
