U Myntri ka sorkar Pdeng u Hardeep Singh Puri mynta ka sngi ula kaweh lama ia ka Bus kaba nyngkong eh jong ka India ka ban iaid da ka bor jong ka Green Hydrogen.
Ka company pynmih umphniang ka Indian Oil Corporation (IOC) ka dei ka Company kaba la pyniaid ia kane ka Bus kaba bam da ka Green Hydrogen ha ka jaka jong ka umphniang. Ka jingpyniaid ia ki Bus da ka Green Hydrogen kan long shwa tang kum ka jingpyrshang bad mynta kin don ar tylli ki Bus kiba pyniaid ha nongbah New Delhi.
U Myntri ula pynpaw ka jingiaroh ia ka company IOC kaba la lah ban pynurlong ia kane ka jingangnud jong ka ri India. U ong ba ka jingpyndonkam da ka Hydrogen kan long ka jinglah jong ka ri India ban kiar noh ia ka jingpyniaid ne pyndonkam ia ki umphniang diesel ne petrol kiba ktah ia ka long ka man jong ka mariang.
Ia kane ka Green Hydrogen la pynmih na ka jaka pynmih gas jong ka IOC’s R&D Centre kaba don ha Faridabad bad kane kan long kum ka jingsdang ia kane ka projek ba thymmai hapoh ka ri India. La iathuh ba ka jingpyndonkam ia kane ka Green Hydrogen ki kali kim pynmih shuh ia ka lyer kaba sniew (Corbon Monoxide) hynrei kin pynmih tang ia ka um ka bym don jingktah ei ei.