U Myntri Rangbahduh ka ri, u Narendra Modi u la ai ka jingkren ha ka Rozgar Mela bad sam ruh kumba 51 hajar tylli ki shithi rung kam sha kito kiba la shah jied ban rung kam thymmai lyngba ka video conferencing mynta ka sngi.
Haba kren ha kane ka jingialang, u Myntri Rangbahduh ula pynpaw ia ka jingkmen jong u bad u la ai ka jingiaroh sha kito kiba la ioh pdiang ia ka shithi rung kam mynta ka sngi. U la kynthoh ruh ba ka jinglah jong ki ban iadon lang jong ki hangne ka dei namar ka jingtrei shitom bad ka jingaiti lut ia lade ba ki la shah jied napdeng ki phew million ngut ki nongialeh ban ioh ia kane ka kam.
Haba kynmaw ia ka jinglehkmen lang kylleng ka ri ia ka Ganesh Utsav, u Myntri Rangbahduh u la ong ba ha kum kane ka jingialang ba kyrpang, dei u ‘Shri Ganesh’ uba la ai ka jingim ba thymmai ia kito kiba la sha jied ban rung ha ki kam bapher bapher. U Myntri Rangbahduh u la ong ruh ba u ‘blei Ganesh’ u dei u blei ka jingjop, da kaba pynpaw ruh ia ka jingsngew skhem ba ka jingaiti lut jong ki nongrung kam thymmai ha ka kam ba la pynshet ha ki, kan pynlah ia ka ri ban ioh ia ka thong jong ka.
Ha nongbah Shillong, la ioh ban sam 293 tylli ki appointment certificates sha ki samla kiba la ioh ban rung kam ha ki tnad bapher bapher kiba kynthup ia ka Department of Posts, Food Corporation of India, Ministry of Health and Family Welfare, North Eastern Electric Power Corporation Limited, Ministry of Education, bad hapoh Ministry of Defence. Napdeng kine 126 ngut ki samla kila wan ban shimti ia ki appointment na Meghalaya Region.
