Ki Karbi kiba shong basah ha shnong Tahpat, ka shnong kaba dang hap hapoh u pud u sam jong ka Elaka Shiliang Myntang, West Jaiñtia Hills District Meghalaya ki la shong kulai da ki Khla. Ka jingpynshlur ki Lehnoh Karbi kiba na sha shiliangpud jong ka thaiñ Labang-Nongphyllut bad Pangam Raliang (Block I) ia ki katto katne ki Karbi kiba shongkhap hapdeng ki Pnar ki Khasi ban ialeh pyrshah ia ki Pnar- ki Khasi naba ki sngew ba ki shong kulai ha ki Khla.
Kane ka shong Kulai Khla ki Karbi ka la paw ha ka thaiñ Lapangap, ong u bah Kreson Lyngdoh haba kren ha ki Nongpathai Khubor hynne ka sngi ha Jowai. Shuh shuh u bah Kreson u ong katba ym pat wan kine ki lehnoh Karbi na sha shiliangpud jong ka thaiñ, ki Karbi kiba shong basah ha Tahpat bad ha kiwei de ki shnong ha baroh shi katta ki ia im ia sahlang bad iatrei ia ktah ia kha-ïi pateng bad ki Pnar ki Khasi, hynrei naduh ba wan phetrieh kine ki lehnoh Karbi na sha shiliangpud jong ka thaiñ bad wan shong wansah ha Tahpat ki sa nud ban ieng ialeh pyrshah ia ki nongshong shnong jong ka Lapangap bad pyndik ia ki Pnar ki Khasi da ki bun rukom ki rukom pyndik, pyntieng pynsmeit ia ki Pnar ki Khasi.
Kine ki Karbi- kiba shong kulai ha u Khla kaba ki kwah ban pyni katno ki long kiba shlur bad ban pyntieng ia kiwei ba kin dem hapoh jong ki, hynrei ka long pat kaba eh ban teh Lakam ia u Khla bad pynphai kat shaba mon. Ki Nongshong kulai Khla lada pher tiak kin sa poi syndon sha ka shnong ki Iawpaw ong u bah Kreson Lyngdoh haba kren hynne ka sngi ha Jowai halor ka jingia kynat kaba dang iaibteng ha ka thaiñ Lapangap.