U Myntri ka sorkar jylla uba dei peit ia ka tnad Arts and Culture, u Bah Paul Lyngdoh ha ryngkat ka jingiadon lang u Myntri ba peit ia ka Education Department, u Rakkam A. Sangma, hynnin ka sngi u la plie paidbah ia ka Shillong Book Fair, 2023 ha U Soso Tham Auditorium, State Central Library, Shillong. La pynlong ia kane ka Shillong Book Fair, 2023 da ka National Book Trust- India, Ministry of Education, ka sorkar pdeng ha ryngkat ka jingiatrei lang bad ka tnad Arts and Culture bad Education Department, jong ka sorkar jylla.
U Bah Paul Lyngdoh ula ai khublei ia ka National Book Trust-India kaba la wanrah biang ia kane ka Book Fair sha ka nongbah Shillong hadien ka jingsangeh ba 7 snem ban pylong ia ka Book Fair bad u kyrmen ruh ba ki paidbah jong ka jylla kin pynkhe im biang ia ka jingieid bad ka jingkhih mynsiem jong ki ban pule ia ki kot katkum ki jingthoh bad jinglong jong ki.
U la kyntu ruh ia ki khynnah pule ban pynmlien ban pule ia ki kot ban ia kaba shañiah ha ki jingthoh kiba lah ban shem lyngba ki bor jingstad science ban tip shaphang kano kano naba ka don ka jingpynkhih mynsiem kaba sngewieid bad jan bha ban pule ia ki kot kumba la thoh ia ki.
U la ban jur ruh halor ka jingdonkam ba ka National Book Trust ban bteng shuh shuh ia kane ha kane ka jylla manla la ka por ne man la ka taiew lyngba ki mobile libraries, ban don ka jingia phyllew jingmut halor rynsan hapdeng ki nongthoh kot, ki nongthoh poetry, ki nongthoh ia ki khana puriskam bad ki nongpule, naba kane kan pynmyntoi shibun ia ki briew bad khamtam eh ia ki khynnah pule.
La pynlong ia kane ka Book Fair ha phyllaw ka State Central Library bad kan neh haduh ka 3 tarik u Risaw 2023.
Napdeng kiba la iadon lang ha kane ka sngi plie ki kynthup ia u bah F.R Kharkongor, uba long u Commissioner & Secretary, Arts and Culture, u bah H.M. Shangpliang, Adviser, Education, u Prof. P.S. Shukla, Vice Chancellor, ka North Eastern Hills University.
