La rakhe ïa ka ‘World Literacy Day’ ha Jowai
Ka ophis jong ka Block Mission Co-ordicator, SSA-SEMAN Thadlaskeiñ Block, West Jaiñtia Hills ha ryngkat ka jingïatrei lang bad ka ophis District Mission Co-ordinator, SSA-SEMAN WJHD, mynta ka sngi Thohdieng kila pynlong ïa ka Enrolment Drive shi bynta na ka jingrakhe ïa ka sngi ka jingnang jingstad ne ka World Literacy Day-2023.
Ïa kane ka prokram hapoh ka West Jaiñtia Hills la pynlong ha Lion Mission Compound Dorbar Hall, Jowai, halor ka phang kaba ong ‘Promoting Literacy for a world in transition: Building the foundation for sustainable and peaceful societies’.
Ha kane ka sngi la ïoh ruh ban pynrung Enrolment Drive ïa ki khynnah kiba la wan phai biang sha ki shlem jong ki jaka pule kiba la don haduh 25 ngut haka R.C Evining Secondary School, Mihmyntdu bad kumjuh la pynkup burom ïa ki nonghikai skul miet kiba dei ki ‘Education Volunteer’ hapoh ka Thadlaskeiñ Block.
Katkum ka report treikam jong ka Out of School Children (Oosc) na ka Thadlaskeiñ Block la ïathuh ba manla u snem kala don ka jingleit rung sha manla ki thliew ïing ban lum jingkheiñ ïa ki khynnah ba pep skul shiteng por bad ha une u snem 2023 kila don haduh 359 ngut ki khynnah Oosc.
Katba kiba la rung thymmai (fresh Enrolment) sha ki skul ha une u snem 2023 ki don haduh 341 ngut bad kiba dang bteng (Continuing) naduh u snem 2022 ki don 401, ka total baroh ki khynnah hapoh ka Thadslaskeiñ Block ki don 742 ngut.
Kumba long mynta hapoh ka Tnadlaskeiñ Block ki don haduh 22 tylli ki Center ha manla ki shnong lem bad ki Education Volunteer nalor kiwei de ki ban ai jinghikai ïa ki khynnah, lyngba kine ki Center kila don ki khynnah kiba la poi sha ka kyrdan High Level bad kiba la pyndep haduh ki jingpule Graduate.
Na ka liang ka kongsan kong A.P Syiem District School Education Officer WJHD kala la pynpaw halor ka jingdonkam ban ïoh ïa ka jingnang jingstad khnang ban rad diengkhong ïa ka jingduk hapoh ka Ri hi baroh kawei, da kaba ai nuksa ba ka Ri India ha ki por mynshwa kala shah synshar ha ki Phareng namar kiba bun ki nong India ki long kiba dang duna ka jingstad.
Kala ong ba ka sorkar jylla bad ka sorkar kmie mynta kila pyrshang ban wad ki lad ki lynti ban pynbha ïa ka pule puthi da kaba pyntreikam ïa ka ‘New India Literacy Progrmme’ bad kane ka prokram kala sdang hapoh ka East Jaiñtia Hills ban ai jingnang jingstad ïa ki khynnah bad shen hapoh ka West Jaiñtia kan sa ïoh ban ïa kane ka Prokram.
Kum ka District School Education Officer ka don ka jingthrang ba ki nongshong shnong ki dei ban don ka jingkitkhlieh ban pynsngewthuh halor ka jingkordor jong ka jingnang jingstad bad ban kyntiew ïa ka imlang ka sahlang, da ka jingkyrmen ba ka West Jaiñtia kan sa long kawei na ki District kaba long 0 precent ka jingdon ki bym nang thoh nang pule. Ka khmih lynti ba baroh ki nongshong shnong kin ïoh lut ïa ka jingnang jingstad.
Ka kyntu jur kumno ban wanrah biang ïa kito ki khynnah ba pep skul shiteng por, khamtam ha ka por ba wan lynshop jong ka khlam Covid-19 kaba la ktah ïa kiba bun ki khynnah.
Ha kane ka prokram la ïadonlang u Principal ka Thomas Jones College Jowai Dr. D. G. Lyngdoh, ka District Mission Co-ordinator kong M. Lakiang, ki Waheh Shnong, ki nonghikai bad ki khynnah skul.
La pynshongshit shuh shuh ïa kane ka sngi da ki jingrwai bad ki jingshad na ki khynnah kiba pule ha ki skul miet, ha kaba la don ruh ka jingsam ïa ki khusnam sha ki nongjop ha ka jingïakop dor dur bad ka jingthoh Slogan. Ïa ka jingïalang ha kane ka sngi la pynïaid da u ma P. Ryngkhlem BRP Thadlaskeiñ Block SSA, katba ïa ki kyntien ai khublei la ïoh na ka kong C. Lyngdoh, Block Mission Co-ordinator bad la pynkut ïa ka prokram da ka jingrwai National Anthem na ka Little Flower UPS, SSA School.
