Ka jingïalehkai phutbol bala tip kum ka (L) Kesilroy Pala Invitation Football Tournament 2023 bala pynïaid da ka West Jaiñtia District Sports Association (WJDSA) kaba la long mynta ka sngi ha madan Kiang Nangbah Stadium, Dongmihsngi Jowai.
Haba phai sha ka jingïakhun Semi Final ba nyngkong ka Mukhla FC kala lah ban pynliem da 2-0 kol ïa ka CSA United. ïa kitei ki kol na ka Mukhla la thep da u Teddy Bang haka minit ba 64 bad u Wadajied Ryngkhlem haka minit ba 90+1.
Lyngba kane ka jingjop jong ka Mukhla FC kala ïoh ban buh jaka ïalade ha ka phainal jong kane ka lympung mynta u snem.
La pyntip ba ka jingïakhun Semi Final ba ar lashai ka sngi 30 tarik u Nailur kan long hapdeng ka Rymbai Shken Shynriah pyrshah ïa ka Salaroh FC ha ka por 2 baje nohphai sngi.