Ka Jaintia Youth Federation (JYF) ka la rai ban pynlong da ka peace rally ha ka 5 tarik mynta u bnai ryngkat ki khynnah (class XI) ki bym pat ioh rung ha ki jaka pule kum ha ki skul bad college bapher bapher kiba don Ri lum Jaintia haduh kine ki sngi.
Ka rai ban pynlong ia kane ka rally ka long hadien ba u Education Minister bad ka sorkar jylla kim shym kren ne jubab eiei da kaba shai halor kane ka jingeh ki khynnah pule wat haba ka JYF kala dep phah sha ka sorkar jylla ia ka kyrteng ki khynnah katkum ka jingpan ka sorkar lyngba i Joint Director Education, West Jaintia Hills District, Jowai naduh ka 11/10/2021.
Ka seng ka pynrem ia ka sorkar MDA bad khamtam ia u Education Minister halor ka jingleh bym suidniew jong ki ia ki khynnah pule Jaintia Hills. Ka seng ka phah ka khubor kaba shai sha ka sorkar ba ka dei ban shim khia ia kane ka jingeh ki khynnah pule bad dawa ruh ba u ne ka wei ruh ki khynnah kim dei ban duh jaka pule kumba ka dei ka kamram jong ka sorkar ban pynbiang jaka pule namar kam shym hap ban siew ia ki da ka tulop.
Ka JYF ka buh ia ka jingkylli kaei ka jingduhnong ka sorkar lada ka pynioh admission ia kine ki khynnah class XI hapoh Jaintia Hills?