Ha ka sngi rakhe ia ka National Voluntary Blood Donation Day, ka Jowai Civil Hospital Blood Bank hynnin ka sngi kala pynkup burom ia kito kiba synniang snam ei sha kane ka jaka pynlang snam jong ka sorkar ha ka jingialang kaba la pynlong ha Conference Room jong kane ka jaka trei kaba don ha Panaliar, Jowai.
Ia kane ka prokram la pynlong da ka Blood Centre Jowai Civil Hospital ha ryngkat ka jingiatreilang bad ka State Blood Transfusion Council & Meghalaya Aids Control Society.
I Dr. P. Shylla ba dei peit ia kane ka Centre ha ka jingkren plie phang kala pynpaw ia ka jingsngewnguh shi katdei eh ia kito ki briew kiba la wan ban synniang snam ei hapoh kane ka Centre na ka bynta ban kyrshan ia ka jingtreikam jong kane ka Centre na ka bynta ban ai ka jingshakri sha ki paidbah kiba donkam ia ka snam ha ka shitom shipa jong ki. Kala pynpaw ruh ia ka jingdonkam ban synniang ia ka snam man la ka por.
Ha kane ka sngi la iadon lang ruh u Daloi jong ka Elaka Jowai u ma Puramon Kynjing bad i Medical Superintendent ka Jowai Civil Hospital Dr. P. Paswet. Ha kane ka sngi la ioh ia ka jingsynniang snam na ki samla jong ka Jowai Presbyterian Church bad na ka Kur Sookpoh Khadar Wyrnai.
