Ki nongtrei ka JHADC hapoh ka lama jong ka Jaiñtia Hills Autonomous District Council Staff Association, (JHADCSA) Jowai mynta ka sngi ki la pynlong da ka jingshong kyllaiñ myngngor ha ryngkat ki placard ha phyllaw jong ka ophis treikam ka JHADC naduh ka por 10 baje mynstep.
Kane ka jingbym banse ki nongtrei ka JHADC ki mih sha madan ka long kum ka dak ban pynpaw ïa ka jingsngewsih halor ka jingbym pat ïoh ïa ka tulop jong ki kaba la kynjoh 10 bnai mynta naduh u December, 2022 haduh une u September, 2023.
Na ka liang u President ka seng ma Johnson Pohrmen ula pynsngew ba ka Association kala shim ïa kane ka sien jam kaba nyngkong jong ka jingïakhih mynta ka sngi ka ban neh haduh ka por jainmiet, shi bynta ban pyni sha ka pyrthei halor ka jingshah leh beiñ jong ki nongtrei kiba la don ha ka jingthngan la 10 bnai mynta.
Ula ong “Lada ka sorkar kam sngap bad kam don kano kano ka jingkitkhlieh na ka bynta ka jong ki kim banse ban shim da kiwei pat ki sien jam ha kine ki sngi ban wan, da kaba u kyntu ïa ka sorkar jylla ban kan pyllait noh ïa ka bhah jong ki kaba dei ka tulop ban pyndap ïa ka jingthngan”.
Shuh shuh ula pynsngew wad na ka liang u symbud myntri rangbah ka jylla ma Sniawbhalang Dhar ula wan hiar dalade hapoh ka JHADC ha u bnai June, 2023 na ka bynta ban ïaphylliew jingmut lang naduh ki MDC bad ki ophisar halor ka jingeh ka Council khamtam ha kaba ïadei bad ka jingsiew ïa ka tulok ki nongtrei hynrei kane kam shem la urlong haduh mynta.
Kane ka jingshem jingeh ki nongtrei ka Council kala sdang ban mih naduh u snem 2019 bad kaba nang ïaid bteng haduh une u snem 2023 la ong u ma Pohrmen.
