Ka Seng FKJGP-Khliehriat Circle hapoh ka jingialam u President ka seng u Mishal Chyrmang ryngkat ka jingsynranlang u Marhok Marboh uba dei u Vice President ka FKJGP-Jaintia Hills Zone bad katto katne ki dkhot ka seng mynta ka sngi kila leit buh daka Memorandum ha u Chief Forest Officer (CFO) Ka Jaintia Hills Autonomous District Council (JHADC) bad sha u Divisional Forest Officer (DFO) Jaintia Hills Territorial Division, ban dawa ban khang ia ka jingshalan ia baroh ki jait dieng beaiñ ki bym biang ia ki kot ki sla kiba mih na ki khlaw bad na ki Saw mill beaiñ ban shalan sha bar ka Jylla katkum ka aiñ Forest Act.
Ka Seng ka ioh shibun ki jingujor na u paidbah ba ka jingshalan tuh ia ki dieng sha bar ka Jylla ka pynrem dor palat ia ki dieng hapoh ka Jylla bad kane ka wanrah ka jingeh ia u duk u suk ban shna ïing shna sem. Ka jingshalan jong ki Sawmill ia ki dieng shabar ka jylla namar ba ki bar jylla (ki dkhar) ki nud ban thied ha ka dor kaba heh dei na kata ka daw ba ki nongdie dieng ki shim kabu bad ki die kajuh ka dor hapoh jylla bad shabar jylla bad kane ka jing pynbiang dieng da ki trai jylla ia ka Assam ka buh jingma ia ka jylla na ka jingsyllen ki khlaw ki btap.
Na kaliang ka Seng kan aipor ar taiew ban khang ia ka jingshalan dieng tuh khlem ki kot ki sla ba biang shabar ka Jylla bad lada ka Seng ka dang lap wat hadien katei ka por ka Seng kan Kem hi bad ka Office ba dei peit ia ka kam khlaw ki hap ban bahkhlieh.
