Ki nongshet ja sngi ïa ki khynnah skul ne ki ‘PM Poshan (MDM)’ hapoh ka lama jong ka All Jaiñtia Mid Day Meal Worker Union (AJMDMWU) Jowai mynta ka sngi kila pynlong da ka ‘jingtied pliang’ bad shong kyllaiñ myngngor shipor ha phyllaw ka ophis District School Education Officer West Jaiñtia Hills District, Jowai.
Kane ka jingmih ki nongshet ja sngi sha katei ka ophis ka long halor ka nongrim ba kim pat ïoh ïa ka bainong (Honorarium) kaba dang sah naka sorkar kaba long 6 (hynriew) bnai kata naduh u bnai April-September 2023.
Hadien ba kitei ki nongïalam ka AJMDMWU kila ïoh ban ïa kynduh ïa ka kong A.P. Syiem kaba dei ka District School Education Officer WJHD, u samla Jerry A. Suting, President All Jaiñtia Mid Day Meal Workers Union & Vice President ka All Meghalaya Union of Cook Cum Helper PM-Poshan haba ïakren bad ki lad pathai khubor ula ong kum ka seng kala buh ïa ka tarik ba khadduh (deadline) ïa ka sorkar ban siew ïa ka bainong kata haduh ka 13 tarik jong une u bnai.
U Adviser ka seng ma K.L. Pariat ula ong kum ka seng kaba dep ban ïakren bad ka sorkar ba kin pynbeit noh mardor ïa kane ka rukom siew ïa ka bainong kaba long manla u bnai, da kaba ula kren shai lada ka sorkar kam lah ban siew ïa ka bainong “la dei ban pynduh noh ïa kane ka skim kaba la treikam naduh u snem 2002 khlem da don kino kino ki jingkylla hapoh ka jylla” namar ka la ktah pynban ïa ka jingmut jingpyrkhat jong ki nongshet ja sngi”.
Ula ong ba ka sorkar jylla kala pynkiew ïa ka bai nong kaba long 1100 bad na ka sorkar kmie 900 baroh ka long 2 hajar tyngka kaba long tang 10 bnai ha ka shisnem bad ka jingbym tikna ka jingsiew, ula ong balei ka sorkar kam lah ban pynbeit ïa kane da kaba siew lypa na ka sorkar jylla ym ban ap haduh ban da poi na ka Union Govt.
Shuh shuh ula pynshai ba kane ka jingsei jong ki mynta ka sngi ïa ki pliang bad ki siang ban tied pynsawa ka long ba kim lah shah shuh ïa ka jingthngan bad kane ka pyni ïa ka jingdukha ka mynsiem halor ka jingbym sngap jong ka sorkar, kumta u buh ka jingkyntu ïa ka sorkar ban shim khia mardor ïa kane.
Ïa kane ka jingïakhih ba jai jai mynta ka sngi la pynlong ha Jowai, Khliehriat bad ha Nongbah Shillong.
ban
