Ka Seng Kur Dkhar Jaiñtia Hills Central Body ka la shim ia kane ka lad ban pynshai paitbah ha kaba ia dei bad ka khubor ba la mih ha ka 1st bad 2nd Oct 2023, ba u Ratan Dkhar ba shong ba sah ha Ummulong West Jaintia Hills u la shah kem ha ki Pulit ka East Jaintia Hills halor ki kam khaïi beaiñ jong u ia ki dawai jyrhoh thok ne phynsedyl u la kam ia lade ba u dei na ka kur ka jait Dkhar kumba la paw ha ki khubor bad social media.
Te ha kaba iadei bad kane ka jingkam jong u, ka Seng Kur Dkhar Jaintia Hills ka don ban pynshai kumne. Hadien ba ka Seng Kur Dkhar Khliehtyrshi Circle kala wan ban tohkit bniah ia u, ryngkat bad ka Central Executive Committee ka la lap ba une u briew um dei satia na ka kur ka jait, hynrei u dei u bar jylla (Non-tribal) na ka jait Sarkar. Te kumta ka Seng Kur Dkhar Jaintia Hills Central Body ka la pynrem jur ia u, bad u la dei ban weng noh shisien don ia ka kur ka jait Dkhar na ki kot ki sla (Documents) jong u baroh naduh ba la pynmih ia kane ka khubor, lym kumta ka Seng Kur kan leh ia u da kaba tyngeh kat kum ki kyndon jong ka kur bad ka Aiñ sorkar.
Ha ka juh ka por ka Central Body baroh kawei lyngba u President jong ka u H.C. Dkhar bad u General Secretary jong ka u H.H Dkhar, ka la maham tyngeh ia kito kiba ai kot pynshisha (Documentary proof) ia ka Kur Dkhar sha ki wei pat khlem da ioh bor na ka Seng Kur bad kum juh ruh lada dang don ki briew kiba shim kur ne ai kur kulmar sha ka kur Dkhar ban myntoi shimet ki dei ban weng noh mynta mardor shisien don ha shwa ba ka kur kan lap ia ki, khnang ba kin lait na ka jingpynshitom na ka kur bad na ki bor jong ka Aiñ.
