Ka Halfway Home kaba don ha Sabah Muswang West Jaiñtia Hills District ba la pynïaid da ka Society for Urban and Rural Empowerment (SURE), Jowai mynta ka sngi kala rakhe ïa ka World Mental Health Day halor ka phang kaba ong “Mental Health is a Universal human right”.
La rakhe ïa kane ka sngi kum shi bynta ban kynmaw burom kyrpang ïa kito kiba don ha ki jingduna haka bor pyrkhat pyrdaiñ, ba ma ki ruh ki don bynta lang kum ki briew kiba im hasla jong ka pyrthei da kaba ym dei ban ïaidlaid ïa ki.
Katkum ki kyndon aiñ la ïathuh kum ki briew kiba shah ktah haka pyrkhat pyrdaiñ ki don ruh ka hok kaba ki dei ban ïoh ha ka jingim naduh ka jingnang jingstad, ka koit ka khiah, ka hok ban kren, ka hok ba trei nalor kiwei kiwei de ki kyndoh aiñ ba la pynkup bor ha ki.
Na ka liang ka Halfway Home Sabah Muswang kaba dei kawei na ki jaka ba peit bad sumar khamtam ïa kito ki dang wan na ki jaka sumar haka liang ka bor jingmut jingpyrkhat da kaba jingdon kane ka jaka kin ïoh shibun ki lad jingiarap naduh ki Counseling, jinghikai Vocational training, ka ithuh ïa ki jaka sah nalor kiwei de.
Katba haka por janmiet la don ka jingïakop dro dur ba la shim bynta lang da kitei kiba dang don hapoh ka Halfway Home kiba la dor ïa jingdro dur bapher bapher kum ki soh ki syntiew bad kiwei de kiba ki sngew shoh jingmut bad la sam ruh ïa ki khusnam bad ki jingbam.
Ïa ka jingïalang ha kane ka sngi la pynïaid da ka samla Niwanka Shylla Project Coordinator Halfway Home Sabah Muswang, la ïoh ruh ban pynsngew ïa ka Report treikam jong ka Halfway Home da u Dr. H.H. Mohrmen Secretary ka SURE. Uba la ai ruh ka jingïaroh ïa i Dr. Anne Paswet Psychiatrist kaba dei ka Medical Superintendent of Jowai Civil Hospital bad Dr. Ebormitre Dann kiba la don bynta ban wan jurip manla ka por ïa ka Halfway Home.
Shuh shuh u Dr. Mohrmen ula ïa khublei kumjuh ïa Dr. Dann iba la ai ïa ka T.V na ka bynta ban pyndonkam ha katei ka ïing bad ula ai ruh ka jingkitbok kitrwaing ïa Doctor. Katba ïa ki kyntien ai khublei la ïoh na ka samla Ilasiewdor Gashnga Social Worker jong ka Halfway Home.
