Kumba 22 ngut ki Artisan ne ki nongshna khiew khyndew (Pottery) ha shnong Tyrshang, West Jaiñtia Hills District, kiba la dep shah hikai pyntbit naduh ka 17-10-2022 haduh 03-03-2023 ha Common Facility Centre ka Lurshai Pottery Cooperative Society Tyrshang kila ïoh jingïarap na ka Skill Meghalaya ka tnad sorkar kaba trei ban kyntiew ïa kim kam shna bad trei kti hapoh ka Jylla.
Na ka liang ka Dakti Kraft, Shillong ha ryngkat ka jingkyrshan ka Meghalaya State Skill Development Society kaba don hapoh ka tnad Labour jong ka Sorkar Meghalaya haka kyrteng ka Skill Meghalaya mynta ka sngi 13 tarik u Risaw kila ai da ki Syrnot (Certificate) bad ki tiar shna khiew khyndew sha kitei ki 22 ngut shi bynta ban pynbha shuh shuh ïa ka rukom shna khiew khyndew (Pottery) hapoh katei ka thaiñ.
La ïathuh ba ka Dakti Kraft Shillong kaba long kawei na ka shlem ban ai jinghikai haka ban pynmih ïa ki tiar kiba shan da ki kti kiba la ïoh jinghikai pateng na ki longshwa manshwa, ba kynthup ïa ka rukom shna ïa ki mar da kaba pyndonkam da ki siej, khyndew, u rimet bad ki jait ksai ba pynmih na ka mariang hi kiba long ruh ki tiar kiba khlem pyndonkam da ki plastic.
Hashwa ban sam ïa ki syrnot la don ka jingïalang ba lyngkot bala pynlong ha CFC ka Lurshai Pottery & Multipurpose Cooperative Society, Tyrshang ba la pynïaid da u Lambormi Suchen, Skill Development Officer haka jingdonlang u Namphrang Diengdoh, Training Manager, Dakti Kraft, Shillong, u Daniel Syiemiong, Inventory Manager Dakti Craft, u Wanki Dkhar, Waheh Chnong ka Tyrshang ki Executive Member ka Shnong Tyrshang, ka S. E. Kharpran Functional Manager ka DCIC Jowai, u Kmen Shylla kam u Special Guest, u Deputy General Manager ka NABARD u G.N. Kharlukhi, u Block Development Officer Dr. B.S. Langbang bad u General Manager ka District Commerce & Industries Jowai u B. Warjri kiba la wan sakhi lang ha kane ka sngi.
Na ka liang u Daniel Syiemïong, Inventory Manager Dakti Craft, ula batai shaphang ka jingthmu ban sam ïa kitei ki tiar, ula ïathuh mynta kala dawa bha ban pynïaid ïew ïa kitei ki mar ne ki khiew khyndew, hynrei ka jingpynmih ïa ki ka dang duna bha mynta kumta la donkam ban don shibun ki nongshna khiew khyndew.
Ula pynsngew ruh ba ïa ki tiar kiba la shna da ki longkmie napoh kane ka thaiñ la ïoh ban pynïaid ïew ïa ki shaduh Delhi ha ka Meghlayan Age the Store, ha ki ïew online bad kumjuh ruh shabar ka Ri India.
U Deputy General Manager ka NABARD ula pynsngew na ka liang ka ophis treikam jong u kila ïoh ban sdang noh ïa ka GI tag Exercise na ka bynta ki nongshna khiew kiba don hapoh ka District.
U Block Development Officer ula pynshlur ïa ki nongthaw khiew ba kin trei shitom haka kam da kaba u khot lang ïa kiwei ban kin shim ïa kane ka kabu, khamtam ha ki prokram ba la khot pynlong da ka National Rural Livelihood Mission kaba ai jingïarap shibun ïa ki longkmie ha ki kam bapher bapher.
Katba u General Manager ka DCIC ula ong naka liang ka ophis treikam jong ka District Commerce & Industries Centre Jowai kan ïai trei shitom shuh shuh na ka bynta ban pynkiew ïa ka ïoh ka kot jong ki nongshna khiew da ka jingïatreilang bad ki tnad sorkar bapher bapher.
Ha kane ka sngi la ïoh ka jingkren na uwei na ki nongshah hikai ban shna khiew u Mithing Shylla uba la pynsngew ïa ka jingsngewnguh khamtam ïa ki nongai jingïarap naduh ka Meghalaya State Skill Development Society ka Dakti Craft bad ki member ïong ka District Skill Committee kiba la trei shitom ban ai jinghikai ïa ki nongshna khiew khyndew kumjuh ruh halor ka jingïoh jong ki ïa kitei ki Certificate, ki tiar seng kam (Start-up Tools) ba kin ïoh pyndonkam manla ka sngi.