Ka kynhun ïalehkai jong ka Shangpung Lumiawmuchai kala jop da 3-2 kol ïa ka Khimusniang SC haka sngi sdang ïa ka Super Division Football Tournament 2023, ba la ai kyrteng ‘U Kiang Nangbah Memorial Trophy 2023’ ïa kaba la pynïaid da ka West Jaiñtia District Sports Association, (WJDSA) Jowai ha madan Kiang Nangbah Stadium, Dongmihsngi Jowai.
Haba phai sha ka jingïakhun mynta ka sngi kala long kaba ïakhaid bha hapdeng kine ki ar kynhun bad ïa kitei ki kol na ka Shangpung Lumiawmuchai la thep da u Elizer Suiam haka minit ba 5 & 14 bad u Chillang Langstang haka minit ba 13. Katba ïa ki kol na ka Khimusniang la thep da u Darimitre Syih ar kol ha ka minit ba 50 & 87.
La pyntip ba ka jingïakhun lashai ka sngi 19.10.2023 kan long hapdeng ka 7 Wasa United pyrshah ïa ka Mukhla Raij SC haka por 2 baje nohphai sngi.