U MLA ka Jowai Constituency ma Wailadmiki Shylla mynta ka sngi Thohdieng ula plie paidbah ïa ka Iawmusiang Urban Health & Wellness Center kaba don mar pyrshah bad ka Jowai Police Station.
Kane ka jaka ai dawai sorkar ka hap hapoh ka jingpeit jong ka ophis District Medical & Health Officer West Jaiñtia Hills District lyngba ka National Health Mission, ha kaba ki paidbah kiba donkam jingïarap na kane ka jaka ai dawai kim donkam ban siew pisa eiei.
Hashwa ban plie ïa ka la don ka jingïalang ba lyngkot bala pynïaid da u Dr. K. Dhar Addl. District Medical & Health Officer, na ka liang u kongsan ma Wailadmiki Shylla ula ai ka jingïaroh ïa ka sorkar kaba la buh ïa ka thong kaba ha khmat eh kata ban pynbha ïa ka koit ka khiah.
Ula ong ka jingdon kane ka jaka ai dawai kan ïarap ïa ki paidbah bad ki nongshong shnong kiba marjan kumjuh ïa ki nongshong ïew, ula pyntip sa kawei ka Urban Health shen yn plie noh ha Mihmyntdu WJHD, kum u MLA u kwah ban pynbiang ïa ki jaka sumar naduh ki jaka nongkyndong khnang ban pynduna ïa ka jingpang jingshitom.
Halor kane ka jaka sumar u buh ka jingkyntu ïa ki paidbah ba kin shim kabu ïa kane da kaba khot lang ïa kiwei kiba donkam jingïarap ban leit mih sha kane ka Urban Health & Wellness Center, ha ka juh por u kyntu ïa ki nongtrei naduh ki Doctor, ki Nurse bad ki nongtrei ba kin long kiba pdiang sngewbha ïa ki nongwan shim dawai.
La ïoh ruh ka jingkren na ka Dr. M. Syngkon, District Surveillance Officer, IDSP na u Waheh Shnong ka Iawmusiang ma Ajoy K Lywait, katba ïa ki kyntien ai khublei la ïoh na ka Dr. L. Pyrbot, Medical & Health Officer, Iawmusiang UHWC. La wan ban sakhi lang ïa kane ka sngi da ki nongtrei katei ka UH&WC ki Waheh Shnong bad kiwei de.
