Ka Jaiñtia National Council (JNC) lyngba ka kyrwoh na u President Rangbah, Bah Sambormi Lyngdoh, ka seng ka kwah ban phah ka kyrwoh kaba shai sha ka Sorkar MDA 2.0 bad khamtam sha ki 7ngut ki MLA napoh Jaiñtia Hills ba ka seng hi ka ieng halor ka nongrim kaba skhem ban pyrshah ia ka jingthmu jong ka Sorkar Jylla ban wanrah iaka Railway Station hapoh East Jaiñtia Hills District, bad lyngba kane ka kywoh ka seng ka kwah ban pynshai halor katto katne tylli ki mat kiba pynlong iaka JNC bad pyrshah jur ia kane ka jingthmu jong ka Sorkar Jylla.
Ka seng ka don ban pynpaw kumne:-
“Ka JHADC kam pat lah ban shna ia ki aiñ kiba khlaiñ ban iada iaka khaïi ka pateng jong ki Trai Ri Trai Muluk & bad ki Dorbar Shnong kim don kata ka jingpynkup bor lyngba ka State lane ki ADC ban pyrkhing bad tehlakam iaka jingwanrung jong ki Mynder Ri, bad kam don kata ka jing pyrkhing ia ki Waheh Shnong bad Ki Daloi ban ai ia ki NOC sha ki barjylla ban sengkam sengjam hapoh ka shnong ka thaw, bad lada wan ka Railway bun ki bar jylla ki ban sa wan seng kam shapoh ka East Jaiñtia Hills District, kumta ngi kum ki Sixth Schedule Area ngi donhok ban pyrshah ia kane ka jingma kaba ap iaka Khaïi ka pateng ki Trai Ri Trai Muluk, tang mynta bym pat don Railway ruh ngi lah ia kynduh shibun ki jingeh lyngba ka jingwan thyllep jong ki barjylla bad knieh iaka kamai kajih jong ki Trai Ri Trai Muluk.
Ka jingwan jong kane ka Railway kansa ktah ruh ia ki shnong ki thaw, ki khlaw ki btab, ki lum ki wah, ki jaka rep jaka riang bad kumjuh ruh kansa pynjakhlia iaki shnong ki thaw.
Ka EJHD kadei kawei na ki District ka bun bha ki factory bad ka jingwan jong ka Railway kan pynmyntoi tang ia kine ki Factories kiba don hapoh ka District bad kan pynsuk iaki ban shallan iaki production ki jong ki sha kiwei pat ki jylla bad kan sa ktah pat iaki Trai Truck kiba dei ki trai Ri trai muluk.
Kaba kham ma kalong ba ynda lah don ka Railway Station la kadei makna ka rail kitmar ruh ngi tipshai ba kan sa pynsuk iaki briew kiba na bar jylla ban wan buhai shnong shapoh kane ka District ka jong ngi bad kane ka jingwan buhai shnong jong ki briew kiba nabar kansa ktah ruh iaka ioh ka kot jong ki trai Ri trai Muluk bad kansa wanrah ruh iaka jing shongkha khleh kaba shyrkhei shaki thaiñ nongkyndong bad ngi lah ruh ban kylla long ki rit paid ha Ri lajong namarba haduh mynta ruh ngim pat don ki aiñ kiba khlaiñ bor kum ka ILP ban iada ia ngi na ka jingwan thyllep jong ki briew kiba na barjylla. Kyntang iawai ka JNC ka kyntu ia ki Myntri jong ka Sorkar Jylla kiba napoh Jaiñtia Hills ban kren lem hapoh ka Cabinet jong ka MDA 2.0 ha kaba iadei bad ka jingsahdien jong ka East Jaiñtia Hills District ha kaba iadei bad u Surok , ki Hospital Sorkar, ka Governmen College bad kiwei kiwei de bad kimdei ban kren tang naka bynta ban wanrah iaka Railway hapoh EJHD namar ia mynta hi ka District jong ngi kam pat donkam ia kata ka Railway, bad ka seng kalong ka bala khreh ban iaid noh da kiwei pat ki lynti lada ka sorkar kam sangeh noh mardor ia kane jingthmu ban wanrah iaka Railway hapoh EJHD”.