Ka jingïalehkai ‘Semi Final’ jong ka kyrdan 1st Division bala pynïaid da ka East Jaiñtia Hills District Football Association (EJHDFA) kaba la long mynta ka sngi ha madan Deinchynrum, Khliehriat EJHD.
Haba phai sha ka jingïakhun Semi Final ba nyngkong ka kynhun ïalehkai jong ka Chiehruphi SYWSC kala pynliem da 3-2 kol ïa ka Khliehriat West FC, ïa kitei ki kol na ka Chiehruphi SYWSC la thep da u Sakhiat Sympli ha ka minit ba 8, u Bretly Nongtdu ula thep haka minit ba 27 bad u Suting Syrti ha ka minit ba 99 jong ka Extra time. Katba na ka liang ka Khliehriat West FC la thep da u Shanbor Malang ha ka minit ba 41 lyngba ka Penalty bad u Dawyoo Bhoi haka minit ba 42.
Lyngba kane ka jingjop jong ka Chiehruphi SYWSC kala ïoh ban rung syndon sha ka jingïakhun phainal jong kane ka lympung bad ha ka juh ka por kala ïoh ban rung sha ka kyrdan Super Division ha kane ka aiom ïalehkai ban wan (Next Season).
La pyntip ïa ka jingïakhun Semi Final ba ar jong kane ka lympung kan long lashai ka sngi 24/10/2023 hapdeng ka Ladrymbai B.SC pyrshah ïa ka Tpepswer SSWO ha ka por 1 baje nohphai sngi.