Ka Indian Red Cross Society, West Jaiñtia Hills District, Jowai hynnin ka sngi 24 tarik kala pynlong ïa ka jingsynñiang snam ha Blood Centre Jowai Civil Hospital, Panaliar halor ka phang kaba ong “Give Blood Give Plasma, share life, share often”.
Hashwa kane la don ka jingïalang ba la pynïaid da u ma W. Lyngdoh, Chairman IRCS, ha kaba la ïoh ruh ka jingkren na u A. N. Sawian, General Secretary IRCS Meghalaya State Br. Shillong, ka Dr. P. Shylla Medical & Health Officer Blood Center, ki nongsynñiang snam nalor kiwei de.
Ka Dr. P. Shylla ka la ong ka jingsynñiang snam ka long kaba donkam eh, kumta ka jingai jinghikai Awareness ka long kaba donkam halor kane ka bynta, ha ka juh ka por kala kyntu kum ki nong synñiang snam ki dei ban long ki nuksa ïa kawei.
La ïathun ba na ka liang ka Indian Red Cross Society West Jaiñtia Hills District, Jowai kala shim ïa kane ka lad ban leit ai snam ka long halor ka nongrim ban ïarap mar kylliang ïa ki para mynsiem briew kiba donkam kyrkieh ïa ka snam ha kano kano ka por bad kan long ka jingkyrkhu ïa kiwei.
Ha kane ka sngi kila don haduh 22 ngut ki dkhot ka IRCS kiba la synniang ïa ka snam bad la pynkut ïa ka jingïalang da ki kyntien ai khublei na u ma O. Laloo, District Secretary ka IRCS-WJHD, Jowai.
