Kum ban shu pynkynmaw ba naka por sha ka por ka JNC bad ka HANM ki juh iatreilang bha ha kaba iadei bad ki mat ki jura kiba ktah iaka Ri bad ka Jaidbynriew ka Bri u Hynniewtrep.
Kum ban shu phai dien haki snem baladep ruh ka JNC bad ka HANM kila ju iadon lang bha haki shnat bapher bapher kum ka Confederation of Meghalaya Social Organization (COMSO) ha kaba ka mat kaba hakhmat duh kadei ka ILP bad la pynlong ruh ia ki jingiakhih ha kylleng ki jaka jong ka Bri u Hynniewtrep kum ha Jaiñtia ka JNC kala pynlong jingiakhih ha kiba bun ki jaka ban dawa naka Sorkar pdeng badei ban pyntreikam noh mardor iaka ILP namar dei tang kane kaba long kum ka Rishot bah haka ban iada lane kata ka dawai bah na ka jingpang kaba ma tam ka jingrung kyrthep jong ki bar Jylla ha kane ka bri u Hynniewtrep tad hadien ka jingiakhih kaba heh tam ba la pynlong da ka COMSO ha nongbah Shillong ha u snem 2019 kaba pynlong ruh iaka sorkar Jylla ban pass iaka resolution hapoh Assembly ban dawa pyntreikam noh iaka ILP na ka Sorkar pdeng.
Hadien kane ruh kum ha u snem ba la leit 2022 ha kaba ka HANM bad ka JNC bad kiwei de ki seng pawkhmat ka Rilum Khasi bad Jaiñtia ki la ioh ban thaw da kawei ka shnat kata kadei ka Save Hynniewtrep Mission ha ka ba la buh ruh iaki Khyndai tylli ki mat jingdawa ba dei ban pyntreikam noh mardor bad la pynlong ruh iaki jingiakhih bapher bapher ha kylleng ki jaka kum ka jingiaid rally ki program bad ki jingpyrta slogan.
Ha kane ka Mission ruh ka mat kaba kongsan duh ka long hi ka ILP ban pynkynmaw ia ka sorkar ba la dei ban pyntreikam noh namar ka sorkar pdeng kala pass iaka CAB lane ka CAA. Nalor kane ka mission ruh ka la dawa na ka sorkar pdeng badei ban ban ithuh noh ia ka ktien khasi ha ka khyrnit kaba phra ha ka Constitution jong ka Ri India.
Bad nalor kine ruh haba phai sha ki mat ki jura ba ktah ia ka Ri lum Khasi bad Jaiñtia ka JNC bad ka HANM ki juh iatreilang bha na ka bynta ka im ka iap jong u paradoh parasnam kata kum ka issue border ka jingiakajia pud ha ki bynta jong ka Khasi bad Jaiñtia.
Kumta ha kane ka kynti ruh ka JNC da kawei ka Sur kan sa leit lang sha nongbah Delhi ban ai ka jingkyrshan kaba pura ia ka HANM ban pyni bad ban pynbor ia ka sorkar pdeng ba la dei ka por ban ai noh iaka ILP ha Meghalaya.
Ka seng ka bynrap ruh ba lada ha Manipur ka sorkar pdeng ka la ai balei pat ha Meghalaya?. Ngi ngi dawa ia la ka jong ka hok ka bok naka bynta ban iada bad pynneh pynsah ia la ka khyndew ka shyiap ka riti ka dustur te kan eh aiu iaka sorkar pdeng ban ai ia ngi ia ka ba ngi dei hok ban ioh. Pynkut ka kyrwoh na u Publicity Secretary bah Mebanteilang Sukhlaiñ