U Deputy Commissioner jong ka West Jaiñtia Hills District u bah B.S. Sohliya, IAS mynta ka sngi ula sam ia ka Draft Electoral Rolls jong ka Special Summary Revision jong ki 4 tylli ki Constituency kiba kynthup ia ka 1- Nartiang, 2- Jowai, 3- Raliang and 4- Mowkaiaw sha ki nongmihkhmat jong ki kynhun Seng saiñhima ha ka jingialang kaba la long ha Conference Hall, DC office Jowai.
Ha kane ka prokram ba lyngkot la iadonlang ruh i Additional Deputy Commissioner (Election) kong B. Blah, u ADC bah F.B. Basan bad i ADC kong DV Lyngdoh.
U bah Sohliya haba ai jingkren ula ong ba ia kane ka Draft Electoral Roll jong ka Special Summary Revision na ka bynta kine ki saw Consituency la dep ban pynmih bad la buh por naduh ka 27 tarik u October haduh ka 9 tarik u December 2023 ban leh ia kino kino ki jingpynbeit ne ki jingthep kyrteng ia kiba la dei hok. Ula kyntu ruh ia ki samla kiba la kot ia ka rta ba 18 snem ha shwa ne ha ka 01.01.2024 ba kin pynrung kyrteng noh ha ka Electoral Roll khnang ba kin ioh ban iashim bynta ha kino kino ki jingjied ia ki nongmihkhmat paidbah.
Na ka liang i kong Blah ba dei ia ka tnad Election ha West Jaiñtia Hills ruh ila ai ka jingpynshai ba lada don kino kino kiba ujor ne pynbeit ia jingbakla bad kiwei kiwei ki jingdawa kin leh ia kane hapoh ka por bala ai naduh mynta ka sngi haduh ka 6 tarik u December 2023, kumjuh ban pyndonkam da ki form 6, 6A, 7 bad 8 katkum ka jingdawa jong ki.
Kala iathuh ruh ba ka ophis District Election kan sa pynlong ia ka prokram SVEEP hapoh kine ki por. Yn sa don ka special campaign ka ban sa pynlong ia ka jingpynrung kyrteng ha ki Polling Station bapher bapher ha kaba ki BLO kin hap ban don kata ha ka 11 bad 18 tarik u November 2023.
