Ka Meghalaya Human Rights Commission ha ryngkat ka jingïatreilang bad ka Kiang Nangbah Government College, Jowai (KNGCJ) kila pynlong ïa ka prokram ai jinghikai halor ka hok jong ka longbriew manbriew ne ka ‘Human Rights’ ha Kiang Nangbah Govt. College Auditorium ha kaba u ma Wailadmiki Shylla ula long kum u kongsan.
La sdang ïa ka prokarm da ka jingkren pdiang na Dr. R. Thangkhiew, KNGCJ, kumjuh la ïoh ka jingkren na ka B. Giri, Member Meghalaya Human Rights Commission, na u Jopmiki Shylla Advocate bad na u A.K. Singh Department of Law (NEHU).
Ka jingthmu ban pynlong ïa kane ka prokram ka long shi bynta ban pynsngewthuh ïa ki samla pule halor ka jingdonkam ban tip ïa la ka hok jong ka longbriew manbriew naduh ka hok ban im, ka hok ban long mar kat juh, ka hok ban kren, ka hok ha ka ñiam bad kiwei de, da kaba pynsngew ruh ba ka Ri India ka don ïa ka aiñ hapoh ka riti synshar kata ban im laidluid khlem da don kiba shah teh kyndon.
Na ka liang u kongsan ma Wailadmiki Shylla haba kren ha kane ka prokram ula ong ïa ka hok longbriew dei ban ai ha manla uwei pa uwei u nongshong shnong bad ula kyntu ba kum kine ki prokram dei ban pynlong manla ka por khnang ba kan long ka jingmyntoi na ka bynta ki samla pule.
La ïoh ruh ka jingrwai na ki samla pule ka College, la sam ruh ïa ki khusnam Certificate sha ki nongjop ha ka jingdro (Poster), ïa kane ka prokram la pynïaid da ka kong Golda Pala (Lecturer English) katba ïa ki kyntien ai khublei la ïoh na u H. Toi, Head of Department, Commerce KNGCJ.