Shi bynta na ka ‘World Sunday School Day’ ïa kaba la ju rakhe haka taïew ba nyngkong jong u bnai Naiwieng bad mynta u snem yn rakhe ïaka haka 5 tarik u Naiwieng 2023 (Sunday) ha kylleng ki Balang hapoh ka Khasi Jaiñtia Presbyterian Assembly.
Hynnin ka sngi Saitjaiñ 28 tarik u Risaw ha Balang Presbyterian Khimusniang, Jowai lyngba ka Committee Sunday School kala pynlong da ka jingïakop dro dur (Bible Drawing) bad ka jingthoh (Bible Story), ha kaba la wan ban ïashim bynta da ki nongpule ha ki skul pynpaw (Sunday School) na baroh ki kyrdan (Department) jong ka katei ka Balang.
La ïathuh ba ka Committee kala pynlong ïa kane ka jingïakop shi bynta ban kynmaw burom ïa kane ka sngi kyrpang ‘World Sunday School Day’, haka juh ka por kan plie lad ïa baroh ki nongpule haki skul pynpaw ka Balang ban ïoh ïashim bynta lang ban pynpaw ïa ki jingtip jong ki shaphang jong kane ka sngi.
Ha ka jingïakop dro dur (Bible Drawing) la shim bynta da kiba pule skul pynpaw haka kyrdan Primary, Infant bad Cradle Roll, katba ha ka jingthoh (Bible Story) la ïashim bynta da ki kyrdan Rangbah, Senior, Intermediate bad Junior, ha kaba ka Committee kan sa sam ruh ïa ki khusnam sha ki nongjop.
