Ka SENG SAMLA KATHOLIK MIHMYNTDU (SSKM), Jowai ryngkat bad ka AI JINGIM VOLUNTEER BLOOD DONOR ORGANISATION (AJVBDO), Shillong ha ka 6 tarik mynta u bnai ka la pynlong ia ka Jinglehburom (Felicitation) ia ki Nongaisnam Sngewbha (Donors) kiba la noh synniang da ka snam ha kine ki por ba don ka lockdown, bad ruh ka jingkynmaw burom ia ka jingdap 15 snem ka jingiaidlynti jong ka Ai Jingim Organisation.
Ka Kong Aitimary Mawlong ka long kum ka Chairperson kala pyniaid ia kane ka program ha kane ka sngi. U Kongsan ha katei ka sngi u ma Kyrmen Shylla Minister ka Social Welfare & Disaster Management Govt. of Meghalaya, u Symbud Kongsan Shri. J. Treilang Suchiang MDC JHADC, Dr. P. Shylla incharge Blood Bank Jowai, Fr. Lawrence Pasweth Spiritual Youth Director Jowai Parish, bad kiwei de ki kynrem ki lyndang. Ha kane ka sngi ka Seng Samla Katholik Mihmyntdu ka la ai burom ruh ia kawei ka longkmie ka Kong Elizebeth Shylla, ia ki jingiarap kylluid mynsiem jong ka na ka bynta kito kiba kyrduh bam ha kane ka por lockdown.
Ha ka jingkren jong u Kongsan ma Kyrmen Shylla u ai ka jingiaroh bad ka jingkhublei kyrpang ia kum kine ki briew kiba kloi ban ai sngewbha ia la ka snam na ka bynta kiwei kiba donkam kyrkieh khlem da siew dor ne ithuh ia kita kiba donkam ia ka snam ha ka por ba kyrkieh. Kumjuh ia ka Seng Samla Katholik Mihmyntdu bad ka Ai Jingim Organisation kiba la trei shitom bad long kiba kloi ban pynshlur ia ki briew da kaba pynlong ia ki Blood Donation Camp ha kum kine ki por jong ka khimkhait. U la kular ruh ban nang iatreilang ia kum kine ki kam kiba kyrpang tam da kaba seng ia ka Kyrmen Foundation ba kan nang lah ban iarap ia kito kiba donkam kyrkieh ia ka snam.
Kiwei de kiba ai jingkren ki kynthup ia u Chairman Balang uba la pdiang sngewbha ia baroh kiba wan sha kane ka prokram. Ia ka jingrwai welcome song la ai da ka Seng Samla Katholik Mihmyntdu.
U Symbud Kongsan ma Treilang Suchiang uba la kyntu shuh ia kine ki Seng ba kin nang iai trei shitrhem shuh shuh na ka bynta ka jingpynim ia ki mynsiem briew.
Ka Dr. P. Shylla kaba la ai ka jingiaroh ia ka Seng Samla namar ba katkum ka jinglap jong ka, ba kane ka seng ka la lah ban pynlong ia ka camp tang hapoh shisnem shiteng haduh lai sien kynthih.
U Ma Alwinson Laloo uwei na ki legendary donors ha kane ka kam ai snam sngewbha bad uba la iathuh ia ki jingleh isynei jong u lyngba kane ka kam.
U Samla Teibormi Dhar uba la ai jingkren kum uwei na ki donor.
Kumjuh la ioh ia ki jingkren na ka Adviser jong ka Ai Jingim Organisation, bad ia kyntien khublei la kren lyngba i Secretary jong ka Ai Jingim Organisation bad la ai ruh ia ki mementos sha ki Donors baroh.
