U D. Dharma Rao, u ba dei u National Consultant – PMTBMBA, jong ka Central TB Division (CTD), Ministry of Health and Family Welfare, jong ka sorkar India mynta ka sngi ula ioh ban ia kynduh ia u Lat jong ka Jylla u Phagu Chauhan ha ka jaka sah jong u ha Raj Bhavan, Shillong.
Ha kane ka jingiakynduh u D. Dharma Rao ryngkat ki nongtrei napoh ka State TB Cell, Meghalaya ba kynthup ia i Dr Moami Marak, SM&HO, Dr Amica Rynjah, APO, bad i kong Barnali kila pynsngew ha u Lat halor ka jingiaid shaphrang jong ka prokram Pradhan Mantri TB Mukt Bharat Abhiyaan (PMTBMBA) hapoh ka jylla Meghalaya.
U Lat ka jylla u dei uwei na ki nongnoh synniang (donor/Nikshay Mitra) uba la pynioh ia ki jingbam tei met sha ki nongpang TB hapoh ka Jylla. U Lat ula iaroh shibun ia ka jingtrei shitom jong ki 132 nong ki Nikshay Mitras kiba kynthup ia ki riew shimet, ki nongmihkhmat, ki NGOs, Corpoations, Cooperative, ki kynhun niam bad ki nongtrei na ki tnat sorkar bapher bapher kiba la mih shakhmat ban iarap ia ki 1177 ngut ki nongpang TB ki ba don mynta hapoh ka jylla Meghalaya.
Na ka liang jong u Lat ula khot ia kiwei pat ban long ki nongsynniang bad ki nongleh isynei na ka bynta kito kiba don ha ka jingpang TB. Ula ong ba ka jingpynioh ia ki jingbam ba tei met sha ki nongpang TB kan iarap ba kin ioh ban koit kloi na kane ka jingpang.
Ka Nikshay Mitra ka don ruh ha ka online ha kaba kino kino ki riew shimet (donor)ki lah ban pynrung kyrteng ialade bad buh la ka soskular ban iarap pynioh jingbam ba tei met ia ki nongpang TB.
