Kumba long ha kiwei pat ki jylla ka ri India ka Jylla Meghalaya ruh kala rakhe ia ka Jan Jatiya Gaurav Divas kaba dei ka jingrakhe kaba manla u snem na ka bynta ban ithuh ia ka jingialeh jong ki paid riewlum ban pynneh pynsah ia ki riti dustur kiba la ioh pateng bad ha ka juh ka por ban kyntiew ia ka dor jong ka jingsngew sarong la ka ri, ka jinglongshlur bad ka jinglong sbun jong ka ri India. Ia kane ka prokram la rakhe ha nongbah Shillong hynnin ka 15 tarik.
Ha ka por mynstep ka la don ka jingkaweh lama da u Chief Secretary ka Jylla u bah D.P. Wahlang, ia ka jingiaid proseshon da ki kynhun bapher bapher kiba la pyni ia ki jingthaiñ jingsuh bad ki jingshna kti bapher bapher, kala don ruh ka jingpyniaid ia ki dur jong ki lai ngut ki riew ialeh lait luid jong ka Jylla.
Ha katei ka sngi u Myntri ka sorkar Jylla ba dei peit ia ka tnat Arts & Culture u bah Paul Lyngdoh ula long u Kongsan ha kaba ula leit buh syntiew ruh ha ka dur mot jong ki lai ngut ki nongialeh laitluid ka Jylla. La iadon lang ruh ha kane ka sngi da u ban P.N Syiem Dupty CEM KHADC, u bah F.R. Kharkongor, IAS uba dei u Commissioner & Secretary ka Arts & Culture bad kiwei de ki Secretary bad Director jong ki tnat sorkar bapher bapher.
Ka la don ka jingpyni ia ka video ba lyngkot halor ka khubor bala phah da u Lat ka Jylla u Phagu Chauhan, ka jingpyni ia ka jingkren jong u Myntri Rangbah ka ri u Narendra Modi.
Kane ka jingrakhe ia ka Jan Jatiya Gaurav Divas kan neh haduh 10 sngi lynter bad kan kut noh ha ka 25 tarik mynta u bnai.
Ka la don ruh ka jingpyllait paidbah ia ki kali ‘Mobile IEC Van jong ka Viksit Bharat’ na ka bynta ki District jong ka East Khasi Hills, West Jaintia Hills, East Garo Hills bad ka North Garo Hills.
