Ka Rumshnong Youth Club Bataw mynta ka sngi ka la ïoh ban pynlong ïa ka program plie pyrda ïa ka 2nd RYC Bataw Knockout Football Tournament 2023, ha ka jingïalehkai ba nyngkong kaba la long hapdeng ka Rymbai Pompyrthad SC pyrshang ïa ka Nongshiliang Pdengshakap ha madan Lacheh Playground Bataw.
Ïa kane ka jingïalehkai la wan plie pyrda da u Gautam Warjri, MCS uba dei ruh u Additional Deputy Commissioner East Jaiñtia Hills District Khliehriat, bad ïa ka jingialang la pynïaid da u Secretary Shnong uba dei ruh u Secretary ka Club u Bah Ampli Rupsi, la ïoh ka jingkren maitphang na u President ka Club Bah Deihok Sumer ïa ka jingthmu ba kyrpang ka club haba pynlong ïa kane ka Tournament ïa kaba ïoh jingkyrshan na ka CMYDS lyngba ka ophis u Deputy Commissioner East Jaiñtia Hills District Khliehriat.
U Kongsan haba ai jingkren u la ïaroh ïa ka club ba ka la bteng biang ban pynlong ïa kane ka Tournament kaba long ka jingkyrkhu kaba khraw ïa ki khun samla ba kin lait na ki jingpynbyrngia ha ki juk internet bad kiwei de ki kam kiba sniew kiba ktah ïa ka jingim jinglong samla bad ïa ka imlang sahlang.
Haba phai sha ka jingïalehkai hapdeng kine ki ar tylli ki kynhun ka Nongshiliang Pdengshakap kala jop ïa ka Rymbai Pompyrthad SC da 2-0 kol. Kane ka long katkum ka kyrwoh khubor ba la pyllait da u Sports Secretary Bah Niki Lyngdoh.
