Ka khubor Pulit kaba la phah la iathuh ba ha ka 17 tarik mynta u bnai ha ka ka por kumba 6:30 ki Pulit kila ioh jingtip ba ka don kawei ka trok kit umphniang kaba don ia u Regn. No NL-01-AH-2246, kala kylla shapoh ka riat ha ki bynta jong ka shnong Umtyra, ha u surok bah NH-06.
Haba ki Pulit kila poi ha katei ka jaka kila lap ia u nongniah uba la tip kyrteng u Shakeep Sheik na ka jylla Maharashtra uba dang sahkut hapoh katei ka trok bad uba la shitom jur. Mar mar ki Pulit kila pyllait ia u bad leit buh sha Civil Hospital, Khliehriat na ka bynta ban ioh jingsumar.
Ha ka jingtohkit jong ki Pulit ia u ne u nongniah ula ong ba kane ka trok (tanker) ka dei kaba kit ia ka umphniang Diesel, ha kaba ki Pulit kila lap ruh ia ki kot ki sla, hynrei haba ki Pulit kila jurip bniah ia ki kot ki sla lyngba ka e-challan App ki lap pynban ba ka kyrteng jong u trai bad ka jaka sah ki long kiba iapher bad kala pynlong ia ki ban suba ei ei halor kane.
Kumta na ka liang ki Pulit kila pynlong shuh shuh ia ka jingtohkit ha kaba kila kynjoh ktien na ka Bharat Petroleum Transport Office, ha kaba la lap ba kane ka trok kam shym la wan thep ne kit Diesel na katei ka jaka saiñ umphniang, kumta kala pynlong ia ki Pulit ban suba jur ia kane ka trok.
Kumta ha ka 20 tarik mynta u bnai ki Pulit kila pynlong ka jingkhynra ia kane ka trok ban lap kaei ba don shapoh. Hadpeng ka jingkhynra ki Pulit kila iohi ia kaei re kaei kaba iphylla hapoh ki kamra jong katei ka tanker.
Ha ryngkat bad ki nongsakhi ki Pulit kila ot ia kitei ki kamra bala buhrieh ia kitei ki mar bad haba la dep ban ot da kaba pyndonkam da ka Gas ot nar ki Pulit kila lap da ki klong dawai Phensedyl Cough Syrup ba 100 ml kiba long beaiñ bad ki don haduh 4135 tylli.
Na ka liang ki Pulit kila shimti ia baroh kitei ki dawai bad la register ia ka case katkum ka kyndon jong ka NDPS Act ha Khliehriat Police Station. Ka jingtohkit mynta ka dang iaid shakhmat ban lap ia kiba donkti.