Ka ophis jong ka Senior Dairy Officer, West Jaiñtia Hills mynta ka sngi kala rakhe ïaka National Milk Day 2023’ haka jingïalang ba la pynlong ha phyllaw jong katei ka ophis Dairy Plant kaba don ha Mooralong, Jowai.
Ha kane ka sngi na ka liang ka kong B. Blah, Additional Deputy Commissioner kala long ka konsan, haka jingdonlang u Dr. I Kjam, District Animal Husbandry & Veterinary Officer, Jowai, u ma. B. Dkhar Assistant Director (HQ) Directorate of Dairy Development, ka kong A. Tyngkan Assistant Commissioner of Food Safety (DO) West & East JHD, ka kong M. Shylla, Senior Dairy Officer WJHD, ma H. Rumut u Dairy Officer, Jowai, ki nongri masi, ki khynnah skul nalor kiwei de.
La pynsngew ba ïa kane ka sngi la ju rakhe ha manla ka 26 tarik u Naiwieng, hynrei mynta u bnai ka hap haka sngi Sunday kumta la rakhe noh mynta ka sngi Thohdieng 24 tarik shi bynta na ka jingkynmaw burom ïa ka lyngkhuh sngi kha u Dr. Verghese Kurien ïa uba la tip kum u kpa jong ka White Revolution.
Kiba bun na ki nongkren ha kane ka sngi kila pynsngew halor ka jingdonkam ban pynmih khambun ïaka dud namar kumba long mynta khamtam hapoh ka jylla bad ki District ka dang donkam bha ki nongri masi ban pynmih ïa ka dud khnang ba yn lah ban pyndap dud dalade ïalade hi khlem da donkam ban shañiah na kiwei ki jylla.
La ong ruh ba ka dud ka long ka jingbam kaba biang nadong shadong kaba lah ban tei ïa ka met jong u briew, ha ka dud ka don ïa ki vitamin, ki nutrient kiba pynïoh ïa ka met kaba koit ba khiah naduh ki khyllung khynnah haduh kiba la tymmen, da kaba ong ruh ba ka kam ri masi ka long kaba don burom ha kum kine ki sngi ba mynta.
“Da ka jingtrei shitom jong ki nongri jingri ban pynmih khambun ka dud ha kine ki sngi ban wan kan don ka jingkyrmen skhem ba yn ïoh ban rakhe sa ïaka sngi bala tip kum ka State ne District Milk Day” la pynsngew kitei ki nongkren.
Na ka liang ka kong B. Blah, Additional Deputy Commissioner kum ka kongsan haba ai jingkren ka kyntu jur ïa ki nongri jingri ba kin wan shakhmat ban shim ïa ki skim jong ka sorkar ha kaba ïadei bad ka kam ri jingri, ha kaba ka sorkar kan ai jingïarap ha ka subsidy kaba haduh 50% bad ka sut kaba rit eh.
Ha ka juh ka por ka kyntu ïa ki nongri jingri ban long kiba lehkhuid bad kiba pyndonkam ïa ki jingstad ban ri jingri katkum ka juk ba mynta da ka jingïatreilang bad ka tnad ri jingri jong ka sorkar.
Ha kane ka sngi na ka liang ka ophis ka la sam ruh ïa ki momentous kum ka jingai mynsiem sha ki nong pynmih dud khambun hapoh ka District bad la sam ruh ïa ki khusnam sha ki khynnah skul kiba jop ha ka jingïakop Debate bad ka Quiz Competition.
