Da ka jingsngew sarong bad ka jingkmen ba khraw, ka Hill’s Farmer Union (HFU), West Jaintia Hills District ka la pdiang sngewbha ia i kong Trinity Sayoo i Nongrep ba la ioh pdiang ia ka Khusnam ba heh tam ha ka ri (Padma Shree Award) na u President ka Ri India u Ram Nath Kovind ha Nongbah Delhi. Kum ban pynkynmaw, i kong Trinity Sayoo i la iohpdiang ia kane ka khusnam na ka daw ka jinglah jong i ban pynshlur ia ki nongrep bad ban pynpawnam ia u Shynrai Lakadong.
Ha ka sngi 10th November 2021 ba i kong Trinity Sayoo i la wan phai sha la ïing, ki Nongialam ba ha khmat jong ka HFU West Jaintia Hills District ha ryngkat ki nongrep, ki la leit ban pdiang sngewbha ia i naduh ka jaka shwa ban rung sha West Jaintia Hills District, ha lait shnong Mookyndur West Jaintia Hills. Wat la ka por ka lah miet, ki nongrep ki ba dap da ka jingieid bad jingkmen kim shym kynran dien ban ap bad pdiang sngewbha ia i nongrep i ba la kyntiew shisha ia ka burom bad ka nam jong ki nongrep ka jylla bad ka District lyngba kane ka khusnam. Ha kane ka jingpdiang burom lyngkot, la ioh ruh ia ka jingkren ai khublei na i kong Trinity Sayoo i ba la ai mynsien ruh ia ki nongrep ban iai trei shitom bad ban long kiba ia tylli.
Ki nongialam ba ia don lang ha kane ka jingpdiang burom ki kynthup ia i bah Mutshwa Thabah (President), Mr Mosses Suting (V-President), Mr. Chanbor Rymbai (Secretary), Mr Supplyme Sari (Organizing Secretary), ki Executive members, ki President bad Secretary na ki Unit bapher bapher ka Thadlaskein Block bad ki nongrep.
La synran ia i kong Trinity Sayoo, ban leit shim ia ka khunsnam na nongbah Delhi da i bah Allfondbirth Kharsyntiew (General HFU Sengkmie) bad i bah Demanson Lyngdoh Project Officer jong ka Lakadong Mission ha ryngkat kiba haiing hasem.