Ka lehñiam Kopati Puja kaba dei kawei na ki lehñiam shisien shisnem hapoh ka Raij Raliang hadien ba la dep ka samoi ot bad wanrah ïa u khaw u kba sha la ki ïing ki sem jong ki khun ka Raij, katkum ka dustur la ong ba ka jingmut jong kane ka lehñiam ka long ban ainguh aidem ïa u Trai nongbuh nongthaw bad ki ryngkew ki basa na ka bynta ki jingkyrkhu ba la ïoh hapoh ka shnong ka Raij.
Mynta u snem ïa kane ka jinglehñiam la sdang naduh ka 28 tarik Naiwieng bad pynkut mynta ka sngi 30 tarik jong une hi u bnai, ha kaba la don ka jinglehñiam bad jingkñia ainguh ha Law Kyntang da u Wamon bad hadien nangta bud pat sa ka jingshad Pastieh ba la shim bynta da u Wamon, u Doloi, ki Langdoh, ki rangbah Kur bad kiwei kiwei ki shakri ñiam ka Raij ha ryngkat ka jingud jingsawa jong ki ksing ki dhah.
Ha ka por mynsngi pat ka jinglehñiam ba bud kadei ka jingleit buh ïa u Syntiew Puja da u Wamon sha ka wah Um Yurem ha kaba la synranlang da ki khun samla bad katto katne ki shakri ñiam ka Raij bad ha ka por janmiet pat ka ladon ka jingshad Pastieh Niam ha ïing u Wamon hapdeng ka jingwan sakhilang ki khun ka Raij ryngkat ki riam ki beit ba iphuh iphieng.
U Doloi ka Elaka Raliang Chawas Lyngdoh haba ïakren ha ka jingïadei bad kane ka lehñiam Kopati Puja ula ong la leh ïa ka manla u snem ha ka taïew ka khadduh jong u bnai Naiweing bad ka jingpyndep ïa kane ka lehñiam kan wan rah ïa ka bha ka miat, ka roi ka par bad kan wanrah ïa ka jingkoit jingkhiah.
La khmih lynti lyngba ka jingpyndep ka Raij ïa kane ka lehñiam Kopati Puja ka long ka jingkyrkhu ïa baroh ki khun ka Raij, ka Elaka bad ka Ri jong ka jaitbynriew hi baroh kawei.
