Hadien ka jingkut noh ka samoi treikam jong u Waheh Shnong ryngkat bad ka Executive Body jong ka Dorbar Shnong Mookyrdup Jowai na ka liang jong u Pa Dolloi jong ka Elaka Jowai u Puramon Kynjing ha ka janmiet jong ka 30/11/2023 ula wan ban thung ia u Waheh Shnong ba thymmai na ka bynta ka samoi ba 3 (Lai) snem.
Ia ka jingjied Waheh Shnong la pynlong ha ka ïing Dorbar jong ka shnong Mookyrdup bad hashwa ban pynlong ia ka jingiajied Waheh Shnong, la pyniaid shipor ia ka jingialang ban pdiang sngewbha ia u Dolloi ryngkat ki nongbud jong u, kumjuh ia ki nongshong shnong da u Waheh Shnong barim u ma Pyrkhat Shylla. Hadien kata la aiti aiti pat ha u Dolloi ban pyniaid ia ka jingiajied Waheh Shnong ba thymmai.
Hashwa ban poi sha ka jingiajied la ioh ia ki kyntien sneng kyntien kraw na u Pa Dolloi, ha kaba ula ai khublei ia u Waheh Shnong barim u bad ia ka Executive Body ba rim jong ka shnong kala lah ban pyniaid beit pyniaid ryntih ia ki kam jong ka shnong ka thaw hapoh ki samoi treikam jong ka, kat haduh ba la poi ka por ban pynthymmai biang ia ki nongkitkam jong ka Dorbar Shnong bad ula ai khublei kyrpang ia ki nongshong shnong kiba iatreilang ha baroh ki liang na ka bynta ka bha ka miat bad ka jingiaidbeit iaid ryntih jong ka shnong ka thaw.
U Pa Dolloi u la kren ruh halor u pud u sam jong ka shnong ha kaba u la kular ban shimkhia katkum ba shong ka aiñ ban wanrah ia u pud u sam jong ka shnong Mookyrdup uba beit ba ryntih. Kumta u khot ia ka jingiatreilang jong ka Executive Body ba thymmai jong ka shnong ban don ka jingiatreilang bad ka ophis jong u khnang ban pynurlong ia kane ka jingthmu.
Haba la poi ka pali ban jied ia u Waheh Shnong na ka liang jong u Pa Dolloi ula buh ka jingkyntu ia ki paidbah ban ai ka jingtyrwa ia ka kyrteng jong u Waheh Shnong ba thymmai ban trei ia ka kam 3 snem nangne shakhmat. Na ka liang jong ki paidbah ba bun ba lang kila tyrwa bad monjur biang ia ka kyrteng jong u ma Pyrkhat Shylla. Kumta na ka liang jong u Dolloi ula pynskhem ia u ma Shylla ban long u Waheh Shnong ba thymmai jong ka shnong Mookyrdup.
Hadien ka jingjied ia u Waheh Shnong la jied pat ia u Asstt. Waheh Shnong hangne ruh ki paidbah kila tyrwa bad monjur biang ia ka kyrteng jong u ma Markus M. Thaiang.
Ha kane ka jingialang la jied ruh sa ia ki nongkitkam bad ki dkhot jong ka Executive Body. La jied Secretary Shnong ia u ma Albert Khonglah, Asst. Secretary ma Disni Khonglah, Treasurer kong Enek Shylla bad la thung ruh ar ngut ki Auditor ba kynthup ia u ma Ruby Well Shylla bad u ma Kermi Langbang. La jied ruh ia ki 12 ngut ban long ki dkhot jong ka Executive Body ka Dorbar Shnong Mookyrdup ba kynthup ia ka kong Monlang Lyngdoh, kong Bety Tang, kong Cherry Dkhar, kong Pynbha Talang, ma M.E. Manner, ma D. Dhar, ma D. Bareh, ma H. Lapasam, ma Larsingh Shullet, ma Wanbiang Lamare, ma Sawni Plain bad ma A. Ksoo.
Hadien ka jingpynskhem ia u ma Pyrkhat Shylla kum u Waheh Shnong ba thymmai na ka liang jong u, ha ka jingkren lyngkot ula buh ka jingkyntu ia baroh ki nongshong shnong jong ka Mookyrdup ban don biang ka jingiatreilang nangne shakhmat kumba kila ai ka jingiatreilang ha kine ki por kiba la dep, khnang ba yn lah shuh shuh ban wanrah ia ka roi ka par hapoh ka shnong ka thaw hi baroh kawei.
