Mynta ka sngi ka Meghalaya People United Front (MPUF), East Jaintia Hills District, ka la leit ban buh da ka dorkhas ha ka ophis trei kam jong u Superintendent of Police (SP) jong ka East Jaiñtia ban buh ka jingkyrpad na u ba un sngewbha ban jurip bniah (Check) noh ia ki nongniah kali kiba khlem don ki license, kiba katkum ka aiñ ki nongniah ne driver haba ki niah kali ki donkam ban don ia ka license ba biang khnang ba kan nym don kano kano ka jingklumar bad kane kan long ruh naduh ki ba niah ia ki kali rit kumjuh ia ki kali ar shaka.
Haba iadei bad katei ka kam naka liang u President jong ka seng u ma Kyrshan Blah u la ong ba donkam shisha ban don iaka license ka ba biang ia ki driver ne nongniah kali, namar “Haba ngi leit sha kawei ka District ngi hap ban pynbiang ia ki kot ki sla, te balei pat ha District jong ngi ngim shem ne lah ban pynbiang” la ong u ma Blah.
Naka liang u SP ruh u la ong ba un sa shim khia ia katei kam namar ka long ka ba donkam shisha ban pynbiang ia ki kot ki sla khamtam ka license khnang ba nym don kano kano ka jingeh hadien habud.