Ka Meghalaya State Watershed and Wasteland Development Agency hapoh ka Soil & Water Conservation Department mynta ka sngi kala pynlong ia ka iew iadie iathied (Mela) na ka bynta ki Self Help Group (SHGs) hapoh ka Pradhan Mantri Krishi Sinchayee Yojana (PMKSY) Watershed Development Component (WDC) 2.0. Ia kane ka Mela la pynlong ha State Central Library, Shillong ha kaba u Marcuise N Marak, Myntri jong ka Soil & Water Conservation Minister ula long u kongsan.
Haba ai jingkren ha kane ka sngi u Marcuise N Marak ula ong ba kine ki Self Help Group Mela kila iarap shibun ban pynlong ia ka PMKSY kaba jop. Ki wanpoi jong ki nongiashim bynta ban pyndap ia ki stall ha ka jingpyni ia ia ki mar jong ki ka pyni ia ka jingtreishitom jong ki nongrep bad ka kynhun jong ki hapoh ki Self Help Group. U Myntri ula kyntu ruh ia ki paidbah ban long kiba kut jingmut ban treishitom ban pynbiang ia ka bam ka dih, ban kynshew kyndiap ia ka um bad ruh ban kyntiew ia ka roi ka par jong ka imlang ka sahlang.
Ha kane ka iew kila don palat 60 tylli ki stall ba ki SHG kila wan ban pyni ia ki mar bapher bapher kum ki jhur ki jhep bad ki jingshna jingthaiñ, ki achar, ka ngap, ki umsoh ki mit mit bad kiwei de ki mar ba bun jait.
