Mynta ka sngi u ma Mul Phawa uwei na ki samla rangbah na ka shnong Cham-Cham ula wan ban plie paidbah ia ka Food Fest kaba la ai kyrteng ka MYWO FIESTA 2023, kaba dei jong ka seng samla jong ka Mookyrdup Youth Welfare Organisation (MYWO).
Ha shwa ban sdang ia kane ka Food Fest kala don ka jingialang kaba lyngkot, ia kaba la pyniaid da u samla E.D. Khonglah uba dei u President jong ka MYWO. U la ai ruh ia ki kyntien pdiang ia u kongsan bad ruh ia u Waheh Shnong bad ki dkhot ka EB kiba la iadon lang kumjuh ia ki nongshong shnong baroh.
La ioh ia ka jingkren na u Waheh Shnong ma Pyrkhat Shylla uba la ai ki kyntien kyrkhu kyrdoh ia ka seng samla bad ia baroh ki khun samla jong ka shnong ryngkat ka jingsneng kyntu ban kiar na ki jingmlien ba sniew.
U ma Mul Phawa kum u kongsan haba ai jingkren ula kyntu jur ia ki samla jong ka shnong ba kin long kiba trei shitom ha kano kano ka bynta jong ka jingim, da kaba pyndonkam hok iala ka jong ka sap ka phong kaba kila don. Ula kyntu ruh ba kin long kiba shim khia wat ha ki kam sport ruh, namar kane ruh ka dei ka wei na ki lad kaba lah ban wanrah ka jingmyntoi ia ka jingim jong ki. Khadduh u buh ka jingkyntu ia baroh ki khun samla jong ka shnong Mookyrdup ba kin kiar na ki jingmlien kiba sniew ban lait na ka jingbam jingdih kiba pynjot ia ka jingim jong ki. U khot ruh ia baroh ki samla ban wan shakhmat ban iakit iabah ia ka bha ka miat jong ka imlang ka sahlang hapoh shnong poh thaw.
U ma Mul u kyrmen ba kane ka Food Fest kan long kaba pyniohnong shibun ia ka seng Samla bad ula kyntu ruh ia baroh ki nongshong shnong bad ki para lok para jor najan bad na jngai ban iawan sha kane ka iew. Na ka liang jong u ma Kongsan ula noh synniang ruh sha MYWO T.25 hajar tyngka.
Haba pynkut ia ka jingialang la ioh ia ka jingkren ai khublei na u Sport Secretary u samla Grorge A Manner. Ha kane ka Food Fest ki don ruh ki jingpynbyrngia ba bun jait nalor ki bam ki dih ba la pynkhreh bha da ki dkhot jong ka MYWO.
Kum ban shu pynkynmaw ba ia ka MYWO la seng nongrim naduh u snem 2003 da ka jinglamkhmat jong ki rangbah ba kynthup ia u ma L. Khonglah, ma A. Khonglah, u ma S. Najiar bad kiwei.
