Ka jingsniew sha palat pud jong u surok NH-6 khamtam naduh ki bynta jong ka shnong Lumshnong shaduh Malidor, East Jaiñtia Hills kala wanrah ka jing jubor ka jingsahkut kali ha une u Surokbah kaba la wanrah ka jinglynga pisa ia ki paid nongleit nongwan.
Tang na kane ka daw jong ka jingsniew shaba palat u surok, ki kali naduh kiba heh haduh kiba rit kila pyrshang ban iaid lait (wrongsite) ia ki thliew ki syar. Kane kala pynlong ia ki kali ban sahkut noh da ki bun bun kynta, kumba long mynta ka jingsah kut ka dangbteng haduh 6 baje duna janmiet.
Nalor kata ka don sa kawei ka trok kaba ingkhong khait na ka jingkem ding naduh kine ki khyndiat sngi, na ki daw bym lah tip, kaba don ia u No.NL 01A – D5408 ba la shu ieh sah ha pdeng lynti, khlem don ba tan ne buh kham sha kyndong.
Kat kum ka jingiathuh jong ki nongleit nongwan ki ong ba kane ka jingsahkut kali kala jia naduh dangstep mynta ka sngi bad kat haduh ba thoh ia kane ka khubor, ha ka por 5:00 PM ruh kane ka jingsahkut ka dang jur bha.
Kaba phylla ka long ba ym don Pulit wan peit wan khmih ia kane ka jingsahkut kali, lait tang ar ngut ki Pulit kiba don hajan Madir, Sonapur. Katba sha kiwei pat bynta kum ha shnong Kuliang bad sharum ym don Pulit satia.
Na ka liang ki nongleit nongwan ba kynthup ia ki trai shnong bad kiba nabar Jylla, ki buh ka jingkyntu ia ki bor pyniaid District bad kumjuh ki bor Pulit ba kin shimkhia ia kane ka jingeh ba ki iakynduh.
