U MLA bah A.L. Hek uba dei ruh u myntri ka tnad AH & Veterinary mynta ka sngi 19 tarik u Nohprah ula plie ïaka jaka ot doh (masi bad shniang) ïa kaba la tip kum ka ‘Modern Bi-Species Abattoir’ Demthring West Jaiñtia Hills District.
Ha kane ka sngi la ïadonlang naduh u MLA ka thaiñ ma Lahkmen Rymbui, MLA ma Wailadmiki Shylla, u S.C. Sadhu Secretary A.H & Veterinary, Meghalaya, Dr. H.K Marak Director A.H Veterinary Department, Dr. D.I. Kjam, District A.H & Veterinary Officer, ki nongïalam shnong, ka seng jong ki nongot doh nalor kiwei kiwei de.
Ïa kane ka Project jong ka tnad Animal Husbandry & Veterinary, ka sorkar jylla la pyntrei da ka Chennai Abattoir Pvt. Ltd. & Rishan Rapsang, kaba la bei pisa da ka sorkar kmie haka jingkot kaba T.7.83 klur tyngka, katba ïa ka pisa la dep ban mang kumba 7.10 klur bad ka pisa kaba dang sah ka long sa 73 lak tyngka.
Ha kane ka Abattoir lah ban ot kumba 50 tylli ki Masi bad 100 tylli ki Sniang haka shi sngi, ka jingdon jong kane ka jaka ka ïarap ban pynïoh ïaka doh kaba khuid ba suba hashwa ban pynpoi sha ki paidbah nongbam doh hapoh ka Jaiñtia Hills.
Na ka liang u kongsan bah A.L. Hek haba ai jingkren ula kyntu lang ïa baroh ban don ka jingkitkhleih na ka bynta ban pynïaid shakhmat ïa kane ka projek ot doh bad ban pynïoh ïa ka doh kaba bah, ula kren shai kum ka jingsdang jong kane ka jaka ot doh kan don hi ka jingduna ha katto katne ki bynta hynrei yn sa lah pat ban pynbeit kloi ïa ki.
U MLA ka Amlarem ma Lahkmen Rymbui haka jingkren ula ong ka jingdon kane ka jaka ot doh kan long ka nuksa ba bha eh naka bynta ban pynïaid ïew ïaka doh kaba pynmih na kane ka jaka wat shaduh shabar jong ka Ri kum sha Bangladesh.
U ma Wailadmiki Shylla ula kyntu ban trei shitom haka kam ri jingri khnang ban yn lah ban pyndap bam nalade ïalade, namar wat na ka liang jong ka sorkar kala pynmih shibun ki skim haka kam ri jingri.
La pynphuh pynphieng shuh shuh ïa kane ka sngi da ki jingrwai bad ki jingshad tynrai na ki nongtrei jong ka DVO Jowai.
