Ia ka 68th Alll India Cooperative Week Celebration 2021 la rakhe ha kylleng ki bynta jong ka ri India bad hangne ha nongbah Jowai ruh la rakhe ia kane ka prokram da ka ophis jong u Assistant Registrar of Cooperative of Societies, West Jaintia Hills District mynta ka sngi ha Dorbar Hall jong ka Lion Mission Compound, Jowai.
Ha kane ka prokram i kong D Syngai, ADM ka West Jaintia Hills District i la long i kongsan. Haba kren ha ka jingialang i kong Syngai ila kren shaphang ka jingtreikam jong ki Cooperative bapher bapher hapoh ka ri India kaba la wanrah ia ka jingkylla kaba khraw ia ka jingim briew la ka dei ha sor ne ka nongkyndong ruh kumjuh. Ka la pynshlur ia ki nongshong shnong ban shim ia ki kaba na kine Cooperative na ka bynta ban kyntiew ia ka ioh ka kot jong ki nongshong shnong. Kumta ka kyntu jur ia ki sahep bad ki nongtrei jong ki Cooperative ba kin nangbai khambha shuh ka jingshakri jong ki sha ki paidbah jong ka District.
Ia ka jingialang ha kane ka sngi la pyniaid da u ma J.M. Pasweth, JCO uba la kdew lyngkot shaphang kane ka jingrakhe mynta ka snem. La ioh ia ka jingkren pdiang da u R. Chakraborty, Asstt. Registrar of Cooperative of Societies, West Jaintia Hills, uba la kren lyngkot ruh halor ka phang pdeng jong kane ka jinglehkmen “Prosperity through Cooperation” bad ka bynta jong ka sngi mynta ka long “Ease of doing business for Cooperatives”.
Ha kane ka jingialang la ioh ruh ka jingpule ia ki Message kum na u Myntri Rangbahduh ka ri India u Narendra Modi bala pule da ka kong R. Lyngdoh, ka khubor na u Amit Shah, Myntri kam pohïing ka ri India ba la pule da u R. Chakraborty, na u O.M. Birla u Shongknor ka Lok Sabha ba la pule d u Emison Tongper bad ka khubor na u President ka NCUI u Dileep Sanghani bala pule da u P. Lyngdoh.
Kiwei de kiba ai jingkren ha kane ka jingialang ki kynthup ia u ma H. Sutnga, kong Muhor Ksiar Syngkon, ma K. Passah, kong E. Blah bad kong O. Lato.
