Da U Soolangki D.Laloo, Jowai
Kiang Nangbah, dapchynrang ka Ri
Khlawait wakhroo man mi!
Na pyrdi u paid, waboon waroh
U Blai iame dajied dathoh.
Me sakhiat u tae u Khat-ar bor
Wym em i thok, wym em i chukor.
Chisur Chidur hei Hok yieñ skem mi
Wow yaleh pyrchah ya ki Mynder Sepsngi
Mynsien maia Ri pynioo mi ki
Haduh wakut ha’u tylle pasi.
Khroo yutang sakhiat man mi
Neibynta ka jaitbru, ka Ri
Nongialam, Nongialeh kam Me!
Cheiwon u chem wan de.
U bru wa em ka nia ka nongrim
Ya ka Ri wa ka jaitbru u pynim.
Kyntien wahok kiwa khlai mi
Kyntien iongme man ka sakhi.
Ha khmat u bru na dwar u Blai
Yei suk wanrah mi cha pyrthai.
A! woh Kiang han em mi cha Sangia
Ia ka Ri wa maïa ïongme to ksan ñia.
To e I sneiñ, pynïoo cha wa thiah wachong
Ïoh ki khon ka Ri u tip u kune, u syndong.
To psiah hei mynsien wei sniaw ki khon ka ri
Ha ki nongialam ka juk katni.
To ïah, to chdooh lang ia ki
Ha ka luti I hok wa shisur donhi.
Khon ka Ri ! ka juk katni
Khutlang o waroh iaphi.
To iabood nongmuna wabha
Kam u Kiang wa maia iongphi ïongnga.
Mynsien atnood, bichni
To beh chajngai nanga, naphi,
Ïa sniaw chi-païu, ïaman iwi
Ïow im ka Jaitbru iow im ka Ri.